U Ian Campbell, uwa jooh mihkhmat ya ka Australia ha ka Olympics da yaroh u yei sap ki khynroo khyllood kiwa yalehke ka Meghalaya yei kreh chitom ki hei chah sikai deiwa ong u wa ye ki wow poi chadooh ka Olympics ha ki snem wow wan.
Ynne da man ko ka sngi wa ar ka Elite Pathway Programme (EPP) Camp wa da pynman ha SAI Centre, NEHU da ka Meghalaya State Olympic Association deiwa ya krehlang waka chnat Sports & Youth Affairs ka sorkar Meghalaya.
Ynne da wan leh wow sakhi da u Assistant Director ka Sports & Youth Affairs, u Paia B War Nongbri yow e mynsien ya kini kiwa yalehke deiwa sñiawskem wa daw ye ki wow ku chakhmat ha ki kaam yalehke.
Kiwa da chah jied wow chimbynta ha kani ka Camp da em ki 200 ngut na ki hajar ngut kiwa da wan chakhmat ha ki District ka jylla wei da jied ya ki hadien wa ye ki wow pynhun yeiwa da booh kyndon.
Ynnin da phah leh ya ki boon jait yow pait biang katwon da ye ki wow pynpliah wei 90% na kini da ye ki wow pyntam yeiwa da ye ki wow leh nachwa.
U Campbell uwa da mihkhmat ya ka EDGE10 waka ARMS PT da ong u wa em na kini kiwa dapoi hadooh ka International Level Standard hadien wa Test ya ki deiwa e nongmuna u wa hei phet 20m, arngut ki kynthai kiwa 14 snem kiwa ye u leh yeini wei waroh da em 9 ngut kiwa da ye wow poi cha ka thong wa da booh ya ki. Da khana u leh wa 14 ngut ki khynnah kynthai kiwa da lehbha hei kynthiar (Vertical Jump Test).
Ha ki chynrang da em uwa 16 snem i rta wa yaleh Basketball uwa da ye u kynthiar 89cm ha ka Vertical Jump ya uwa da yaroh bha u Campbell deiwa ong wa ini toh i sabut wa em ki yei sap wei boon da ye ki wow leh palat yeiwa da yooluti na ki.
Na ki 9 bnai wa da em u Campbell ha Meghalaya, le bnai chiteiñ da lai u cha kawi pa kawi ka District yow thooh ya kiwa em yei sap.
“Iwa da chem i toh wa ha Meghalaya kiwa yalehke toh kiwa da em chwa yei sap ha ki nadooh i bor wa i smat i stiñ wei kini toh ki yurim wa emkaam u em yow ye u tei pynheh pynsan. Wei iwa da yoo ha kani ka e sikai toh kini kiwa yalehke da ku chooh chooh ki heiwa 90% na ki da ye ki wow pyntam yeiwa da dep chim yukheiñ nyngkong ya ki iwa da pynkhyrngiat wei da pynkoo ki leh yei sap wow man kam kiwa yalehke wa yatoh kyrdan wa kiwi hapoh pyrthai wei kattu ka thong toh yow pynman ya ki kiwa ye wow yakhun ha ki rynsan yakob ka ri wa cha baar ri ha kini ki snem wow wan,” da ong u Campbell uwa jooh man kam uwa yalehke Long Jump.
Mynstep ka sngi da booh neibynta ki Coach, wei daw em leh ka bhah ya kiwa yalehbol hapoh i pait uwa yaleh World Cup ka Denmark uwa jooh yaleh leh ya ka Manchester United, u Jesper Olsen uwa da mihkhmat ya ka Future Football.
U Olsen da ong u wa ka thong toh yow e ki buit thymme ya ki Coach neibhah emkaam ya ki Coach yow pynwandur ya kiwa em yei sap wei daw pynman leh ya ki Webinar ya palat 30 ngut ki Coach yow ye u sai uwi lane arngut kiwa yalehke ki wow yoh u psiah cha ka Commonwealth lane Olympics Games wei kiwa ye u yalehke hapoh ka English Premier League. Heijooh i por da ong u wa yow ye u sai leh ya uwi u National Level Coach chwa wa hap ki wow pyndep noh ya ini i e sikai.
