Jowai: Ka seiñ All Hynniewtrep People United Front (AHPUF) da yaroh wei e khublei ko ya ki Waheh Chnong ka Jowai wada chim ki yaka luti yakhih dei luti wa jai jai, ka Stay at Home Protest yow pyrchah yei leh embor ka sorkar Meghalaya Democratic Alliance (MDA) wow kyrriah yaka PWD North Division Jowai na Jowai cha Shangpung khlem i mynjur u paidbah.
Ka seiñ da e khublei haroh ko yaki paaid wa chong chnong ka sor Jowai wa da e ki yei kyrchaan wa pura ha kani ka khang chnong kawa da lai bait lai ryntih.
Heijooh i por ka AHPUF da beiñ joor ko yei leh embor ka sorkar MDA wa yahkhmat daka NPP wym em de ap ko yei sur u paidbah ka sor Jowai wa ki seiñbhalang waphær waphær kiwa da pynsñiaw yei pyrchah nadooh ki snem wa dep. Neitæ ka seiñ da beiñ joor haroh ko ya u MLA ka Jowai u Wailadmiki Shylla deiwa ong wym em chimkhia u yaka kani ka kaam.
Ong ki wa i kular yong oo wow pyrchah yei thmu kyrriah ka sorkar ya ka PWD North Division toh du i pynbieij yaki paidbah katwa ha Assembly won deiwi, iwa ya sariem leh wa i leh ka Agatha Sangma MP ka Lok Sabha heiyatoh waka aiñ CAA.
Neiliang ka AHPUF e ko i kyrchaan yaka Synjuk ki Waheh Chnong Jowai wei kyntu ko leh yaka sorkar wow ap ko yei sur u paidbah dei wow wanrah biang yaka chnat krehkaam PWD North Division cha Jowai.