Uwi u khynnah wa 19 snem uwa da pyndep ya ka NEET, u Atharva Chaturvedi na Jabalpur da yasaaid u ya ka mukotduma u ha Supreme Court ka India khnang wow yoh Admission MBBS hadien wa chah kyntait u lyngba ka Economically Weaker Section (EWS) Quota.
U Atharva da Pass u ya ka NEET 2024-25 deiwa yoh 530 Marks na ka 720 wei da poi u ha ka Rank 164 hapoh ka EWS Quota.
Hanla poi u ha ini i kyrdan da chah kyntait Admission u neibhah wa ka sorkar Madhya Pradesh ym em pynkrehkaam ko ya ka 10% ka EWS Reservation ha ki Private Medical College.
Ya ka EWS Quota da wanrah lyngba ka 103rd Constitutional Amendment, heiwa da pynpsiah ha ka Article 15(6) wa 16(6) ha ka Constitution, wow booh Reservation ya kiwa wan na ki manyung wa duna hei yoh i laa namo ki Economically Weaker Section ha ki thaw puræ wa ki kreh sorkar.
Ya ki EWS da yoh ki ya ka 10% Reservation ha India heiwa u kynthup ya ki manyung wa kamai hapoh Rs. 8 lak chi snem.
Hadien wa chah kyntait, u Atharva da sdang u wow puræ ya ki kyndon aiñ kamjooh ki mukotduma warim wei da ujor nyngkong u ha Madhya Pradesh High Court, kawa da hukum wow pynkrehkaam ya ka EWS Reservation ha ki Private Medical College hapoh chi snem. Tangwa ym em pynkrehkaam ya kani ka hukum wei ini da pynbor i ya u Atharva wow lai cha ka Supreme Court lyngba ka Online Petition.
Ya kani ka mukotduma da wanrah ha ka miej bichaar wa khlieh da u Chief Justice, u Surya Kant, heiwa u Atharva da em u samen hakhap ki muktiar khlem tip kammon won u leh.
Manda pynkhreh ki Judge u yieñ, u Arthava da yieñ u wow paan por 10 minit wow pynsñiaw ya ki ñia neibhah wa da em i pynkylla (Amendment) ya ka Constitution wa ki hukum wa da pynmih nachwa wei ka sorkar jylla ym em pynkrehkaam ko ya ki kyndon aiñ iwa da pyndooh ya oo wow lai puræ MBBS.
Ka Supreme Court da rai ko wa u Atharva da chah kyntait Admission u wei da phah ko ya ka National Medical Commission wa ka sorkar Madhya Pradesh wow chah ya oo wow puræ MBBS u ha ki Private Medical College.
Discussion about this post