Ka Don Bosco College Byndihati, East Jaiñtia Hills District chirup i yakrehlang wa ka Ministry of Youths Affairs & Sports Regional Directorate ka NSS, Guwahati ka sorkar India, ynne ka sngi da pynman ko yaka Viksit Bharat Youth Parliament 2025 namo ka rynsan yaklam hajrong ka phang ‘One Nation One Election, Paving the Way to Viksit Bharat’.
Ha kani ka rynsan pynyoo nia da wan chimbynta da ki khynroo khyllood ka Ri-loom Jaiñtia wa kynthup na ka Kiang Nangbah Govt College, Jowai, ka Thomas Jones Synod College, Jowai, ka Khad-Ar Dolloi Law College, Jowai, ka Jaiñtia Eastern College ,Khliehriat wa ka Don Bosco College, Byndihati.
Kiwa chimbynta wow e i kyrchaan ya kani ka phang da ong ki deiwa pynman heijooh i por ya waroh ki Election la neibynta ka Election Parliament, State Assembly, ki Local Body daw yarap ko wow yoh yei chakri wa biang heiyatoh i roi i paar, ki aiñ ki kyndon krehkaam wa kiwi. Katwa kiwa pyrchah won ya kani ka phang ong ki dei pynman ka jooh ka Election ye ko wow wanrah i maa hei synchaar khadar deiwa pynyoo leh ya ki yurim.
Ha kani ka pynyoo nia yei kyrdan wa nyngkong da yoh ka Kalung Angel, wa ar ka Amy Lapasam, wa le u Sanjay Shreshtha, wa soo ka Febilliza Dkhar, wa san ka Vida Pala kiwa na Don Bosco College Byndihati.
Ha ka kyrdan wa ynru da yoh ka Riwanka Suchiang, hei ynñiaw ka Iaplilang Nongrang, wa phra da yoh ka Beautiful Dhar kiwa mihkhmat na ka Kiang Nangbah Govt College, Jowai.
Ha ka kyrdan wa khynde da yoh u Lambokstar Jyrwa uwa na Don Bosco College, Byndihati, katwa hei kyrdan wa chiphaw da yoh u Trebokmi Talang wa na Khad-Ar Dolloi Law College, Jowai.
Kini kiwa jop daw mihkhmat chimbynta won ki sa ha ka State Level.
Chwa ini da em ka yalang tbian wa da emlang u Fr. Daniel Dabitlang Cajee, Principal ka Don Bosco College Byndihati, u Dr. Seven Dar Dkhar, NSS District Nodal Officer uwa da e leh i klam yahkhmat hajrong ka Viksit Bharat Youth Parliament, u Justin Dkhar, MLA warim ka Khliehriat, u Wailad Dameshwa Siangshai, MDC ka Musniang Rngad, kiwa sikai na ki College wa chimbynta wa kiwi.
Da pynkut ya kani ka rynsan yatai dei saam certificate wei kyntien e khublei na ka Stacey R Nongbri, NSS Programme Officer.
Discussion about this post