Shillong: Ka MLA ka Congress na East Shillong ka Ampareen Lyngdoh thmu ko wow yakhun ya ka election MDC ka wow man ha u snem wow wan lada chah ka aiñ.
Da sñiawthooh wa ka Congress kwah ko ya ka Ampareen wow yakhun ya ka MDC na Laitumkhrah-Malki Constituency hadien wa ym yoh ko ya u kyrtong wa monlang waroh hadien wa da yut noh u Antonio War ha ki snem wa dadep.
Kawi won ka daw wa pynman ya ka Ampareen wow mih madan ha ka election MDC toh hadien wa u James Lyngwa uwa da jied rap nachwa wow man kam u kyrtong, da ran dien noh u neibhah ym chait ware i doh i pran u.
Hawa yaklam wa kiwa pathai khubor ynne ka sngi, ka Ampareen da kubur ko wa da em i yaklam hajrong ini wei dang pyrkhat ko yeini lada ka aiñ chah ko wow man kyrtong ko.
Kam wow pynkynmoo heini ka Congress da dooh ko ya u MDC yong ka na Laitumkhrah-Malki hadien wa u Antonio War da yut noh u cha ka BJP chwa ka Election MLA wei katni won da psiah u cha ka UDP.
Hajrong ka Election chiteiñ samoi ha Ranikor, ka Ampareen da ong ko wa ka Party dang pyrkhat bha ko ya kani ka kaam khamtam wow thooh ya u kyrtong wa biang.
Katkam wa ong ka Ampareen lada ka party ym yoh kyrtong ko da uwa biang wow yakhun pyrchah ya u Martin M Danggo u wow yakhun na ka NPP, ka party daw pyrkhat ko wow kyrchaan noh ya u kyrtong ka UDP, lada em laad u wow jop.
Tangwa hajrong ka South Tura, ka party da em ko ki bru wa biang wow yakhun wei ym em dooh kyrtong ko kamwa man ha Ranikor.
Da yachem ko leh ya uwa yahkhmat ka Congress u Dr. Mukul Sangma hajrong ka Election ha Ranikor wei ka party daw pynbna ko ya ka buit krehkaam manda biang i por.
Rap nachwa, da mih ka khubor wa ka Congress ye ko wow kyrchaan ya u kyrtong ka UDP na Ranikor ha kani ka kynti lada ka UDP mynjur ko wow dam noh u kyrchaan ya ka sorkar Meghyalaya Democratic Alliance (MDA) wa yahkhmat da ka NPP, wow chna sorkar noh wa ka Congress.
Discussion about this post