Ye ki soo ngut ki Montri ka sorkar MDA-2 wow chah kylliang noh

Ki soo ngut ki Montri sorkar wa kattæ ye ki wow chah kylliang noh da kiwi hapoh ka sorkar MDA-2 iwa da ye wow jia ha uni u bnai wow wan.

Kini ki Montri wa ye u chah kylliang noh toh u Montri ka chnat Puræ Puthi uwa ksoh leh ya kiwi de ki chnat, u Rakkam A. Sangma deiwa thung da u Marthon J. Sangma, MLA ka Mendipathar.

U A.L. Hek uwa man kam u Montri ka chnat Animal Husbandry & Veterinary deilang wa kiwi de ki chnat, daw chah kylliang u da u MLA ka South Shillong, u Sanbor Shullai.

Related posts

Dawa ka PSM na u DC ka West Jaiñtia Hills wym toh u chim bai luti ha ka Toll Plaza neibynta ki kari ML04

January 12, 2026

Dawa ka HYC wow su ya ka tulop ki Contractual Nurse wa sahteiñ nadooh u Naichiphaw 

January 12, 2026

U Montri ka chnat Food Civil Supplies and Consumer Affairs uwa ksoh leh ya kiwi de ki chnat, u Comingone Ymbon ye u wow chah kylliang da u MLA ka Jowai, u Wailadmiki Shylla.

U Montri ka chnat Sports and Youth Affairs wa kiwi de ki chnat, u Shakliar Warjri leh ye u wow chah kylliang ha u para MLA ka HSPDP, u Methodius Dkhar.

Ini da man i leh kam iwa da pynbait hi nadooh wa sdang wow chna ya ka sorkar MDA-2 ha u snem 2023 wa daw yabhah ya ka chuki Montri.

Ka BJP toh kawa da pynbait chwa hapyrdi ki ar ngut ki MLA ko wow yabhah ya ka chuki Montri deiwa ksoh mar ar snem chiteiñ kamjooh ka Hills State People’s Democratic Party (HSPDP), leh da sñiawthooh wa da leh ko yeini i jooh neibynta ki ar ngut ki MLA ko.

Heiyatoh wa u Wailadmiki, ha ki yalang paidbah da jooh ong u wa daw yoh u wow man kam u Montri sorkar wei u Marthon Sangma uwa man leh kam u MLA ka NPP ye u wow psiah heithaw u Rakkam kiwa man ki MLA ka NPP na Garo Hills katwa u Wailadmiki wa u Comingone toh ki MLA ka Party na Jaiñtia Hills.