Ka Meghalaya Pradesh Congress Committee (MPCC) da rai ko wow pyntip chwa cha ka All India Congress Committee (AICC) hajrong i lai kyrchaan ki 5 ngut ki MLA wow lai ya krehlang ha ka sorkar Meghalaya Democratic Alliance wa emlang ka Bharatiya Janata Party.
U President ka MPCC, u Vincent H Pala da pyntip u wa ha ka yalang da yoh yei jar jiar i pynsñiaw wa i e yumut wei daw phah cha ka All India Congress Committee (AICC), tangwa da ong u wa kamwa da man da yoo, ki heh ka Congress na Delhi ym sñiawsuk ki wei ki 5 ngut ki MLA yei ki wow chah pyndooh man dkhot chipor (Suspend) wei daw phah leh da ka chithi wow paan pynche na ki 5 ngut ki MLA wa iyi i daw wym beh seiñ ya ki.
Ki 5 ngut ki MLA wa dang sah yong ka Congress ha ka 8 tarik uni u bnai da lai e ki da ka chithi ha u Montri Rangbah ka jylla wow pynsñiaw yei kyrchaan wa pura ya ka sorkar Meghalaya Democratic Alliance (MDA) wa yahkhmat da ka NPP wa da emlang leh ka BJP najrong kiwi seiñ saiñpyrthai wa ki MLA khlem seiñ.
Ka MPCC da pynsñiaw ko wa ym tip ko iyi iyi ya ini i ka rai yong ki MLA, wei ynne ka 11 tarik da khut jhan ya ka yalang yong ka Executive Committee wow yatai hajrong ini i chim luti ki MLA.
Ha kani ka yalang napyrdi ki 5 ngut ki MLA kiwa da poi cha i khut yong ka MPCC da wan du ar ngut kitæ u Mohendro Rapsang, MLA ka West Shillong wa u Mayralborn Syiem uwa man u MLA ka Nongpoh, katwa kawa yahkhmat ka Congress Legislature Party, ka Ampareen Lyngdoh, u PT Sawkmie wa u Kimfa S Marbaniang ym em poi ki.
