Jowai : Kani man ko ka khubor kawa phylla tam hei yatoh wei suk i lai i wan ki paidbah ha ki surokbah National Highway wa ki State Highway hadien wa da pynmih hukum ka Supreme Court ha ka 3 Wisu 2015 lyngba ka F.No. 44/CoRS/2014.
Ha kani ka hukum wa da pynmih da ka Supreme Court Committee on Road Safety ya kawa da khlieh da u Justice K.S. Radhakrishnan da booh ya 16 tylli ki mat wa ki sorkar jylla toh u pynkrehkaam ki. Ya kini ki mat toh u pynkrehkaam ya ki chwa u kut u Naitung 2015 wei hapoh jylla yong i da sdang u pynkreh yeini kajak chisien.
Kini ki 16 mat kynthup ki nadooh i pynher smat ya ki kari, wow booh ya ki pulit u patrol ki dei langer, i yah kari hei muaaid, wow yah kari khlem daiñ seatbelt, i booh ya ki Hoarding næ ki Bilboard harood surok, i dai kyiad harood u surokbah, wa kiwi kiwi.
Kamwa da yoh i u sakhi hapoh jylla da sdang u pynkrehkaam ya kani ka hukum neibhah ha chnong Jowai ki pulit da pynkrehkaam ki yei wow daiñ ya ki seatbelt, ha Shillong da yoh ya ka hukum na u Executive Engineer PWD (Roads), Jowai Central Division, u M Marbaniang wa waroh ki poster, ki advertising hoarding ki bilboard nadooh na Shillong Civil Hospital hadooh ha Mawblei da phah kyrriah ya ki waroh hapoh 30 sngi.
Heijooh i por ka yutip wa da yoh da ong wa ka sorkar ye ko leh u khang noh ya ki dukan dai kyiad kiwa em harood u surokbah National Highway wa ki State Highway.
Discussion about this post