Jowai: Ki khynnah puræ ka Kiang Nangbah Government College Jowai, hapoh ka lama iong ka Kiang Nangbah Government College Students’ Union (KNGCSU) hadien wa da dep ki u pynman ia ka iakhih ha 14 tarik u bnai July deiwa lai paidbah ki na koleg lyngba u sarok bah National Highway 44 hadooh ka ophis u DC iow pynyoo ia i dak pyrchah iaka sorkar jylla hei iatoh wa ym em pynioh ko iaki dawa hei iatoh wa i pynku iaki kyrdan puræ, u pynchna ia u surok iong ka koleg, u wai noh iaka Girls’ Hostel wa kiwi kiwi. Ka Students’ Union da rai ko wa ye ko u sdang biang ia i iakhih ha kini ki sngi wa daw wan.
Hei iatoh wa ki dawa iong ka seiñ ka KNGCSU da pynbna ko wa haka 22 tarik uni u bnai ye ki u sdang biang ia i iakhih lada ka sorkar dang pynslem ko u pynkrehkaam ia ki kular iong ka. Neibah dang ha kini ki khajiak sngi ka Student Union hapoh i iahkhmat u Vice-President u Plieladlang Pohthmi da dep wan iachem ki ia u Chief Engineer P.W.D. (Building Division) iow pynkynmoo ia oo hei iatoh u pynbiang iaki estimate ha i por wa biang na i wynta u sarok wa psiah chapoh ka koleg.
Hadien ka iakhih kawa pynman ha u bnai July, ka sorkar ym em leh ko iyi iyi leh i kaam, iwa kut dooh hei kular donhi. Ha ijooh i por leh ka Students’ Union da dep lai ko cha ka ophis ka Director of Higher & Technical Education iow pynkynmoo iaki leh ia iwa dooh tulop ki nongkreh la 10 bnai kattu. Da pynkynmoo ki ia kiwi de ki dawa wa sahtein deiwa e por leh 15 sngi ia ka ophis u leh ki ia iwa emkaam.
“Ka Kiang Nangbah Government College toh kawa em kawi donhi kam ka i thaw puræ sorkar hapoh ka Ri-loom Jaintia kawa e inang istad iaki khynroo khyllood kiwa wan na ki ïung ki sem wa dooh wa duk, hynrei sniawsih won wa man ko hadooh katni ka thaw puræ kawa dang em boon kiwa duna hawa nujor waka Tura Government College, ye u man naki daw wa ki nongmihkhmat iong i dang iohthiah ki khlem da yoo ki ia jingeh hapoh ka chnong waka thain hi waroh kawi” ong ka KNGCSU.
“I khut lang i ia waroh ki seiñbhalang wa ki paidbah u wan kyrchanlang ki ha kani ka 22 tarik lada ka sorkar dang leh khlot ko ia ki hok u ioh i kam ki khynnah puræ” ong chooh chooh ka KNGCSU.
Discussion about this post