Ye u Rowell Lyngdoh wow dam u yakhun na ka party Congress

Shillong: I kawang ktieh ki dkhot ka Congress Mawkyrwat dang joor ko kat dang mih ki sngi khamtam hadien wa da pyndam wa ka Mawkyrwat Block Congress da ka MPCC.

Uwa pathai khubor da yoh u wow yaklam wa u MLA u Rowell Lyngdoh wa ya u Mansturdy Nongrem uwa man kam u President ka South West Khasi Hills District, kiwa da pynsñiaw ki ya jar jiar ki nia yong ki.

“Nga sñiawphær O wa da pyndam hi-eh ya ka Mawkyrwat Block Congress khlem kynjok ktien ya nga u MLA”, da ong u Rowell.

Da pynsñiaw u leh yei mynsien artatien wa lada u paan ticket u na ka Congress namo ym paan, “Daw chong yalang chwa O wa kiwa yahkhmat wa kiwa kyrchaan lada u paan ticket namo ymboi na ka Congress”.

Katkam wa ong u Rowell, da ong u wa em kiwa kyrchaan ka Congress kiwa da lai cha kawi tawon ka party tangwa neiliang yong oo, daw chong yalang u wa ki paid u ha ki sngi wow wan wow chim ya ka rai.

Related posts

Ya ka Election cha GHADC daw pynbna hadien ka Delimitation

April 15, 2026

Baam smai u Samrat Choudhary kam u CM wa thymme ka Bihar

April 15, 2026

Katwa u Mansturdy da kam u wa katkam ka yutip wa da yoh u, u Rowell da lai pynche u cha kiwa kyrchaan ya oo wa ym yakhun de u na ka Congress.

Da ong u wa hadooh katni ympu ye u ong wa lada u Rowell daw paan ticket u namo ym paan na ka party.

“Ympu paan tiket u na ka party hadooh katni tangwa daw pait i ha ki sngi wow wan neibhah dang biang hi i”, da ong u.

Da ong u leh wa hadooh katni ka party da yoh ko dang du kawi ka application na u Carnes Sohshang wow yakhun na ka Congress na Mawkyrwat.

Da ong u leh wa neiliang yong oo, daw kyrchaan bait u ya uwon uwon u kyrtong wa e ticket ka party.