U montri i chait i khiah ka jylla u AL Hek da pyntip u wa ynne ka sngi lyngba ka Video Conference da yaklam wa ki DC kamjooh ki DM&HO yong ki waroh ki District ka jylla heiwa da thung ya ki DC kam ki Chairperson katwa ya ki DM&HO da thung kam ki Member Secretary kam chibynta ki District Committee wow pynkhlan ya ki kaam sumaar sukher hapoh ka jylla namo ka Strengthening of Health Care System, heiwa da dep pynlait T. 75 klur wow leh ya ini.
U Hek da ong u wa kani ka poisa u pynemkaam yaka yow pynbha pynmiat ya iwa duna wei ki DM&HO daw hap ki wow thoh cha ka Directorate of Health Services yow pyntip yeiwa emkaam ki PHC, ki CHC kamjooh kiwi ki thaw sumaar wei daw jied ya kiwa emkaam dooh yow pynbha pyndap chwa.
Chooh chooh da ong u wa da em boon ki dawa wow pynku kyrdan ya ki PHC cha ki CHC wei ya ini ye wow leh ym toh deiwa chna ya ki thaw sumaar wa thymme, wei ye wow pynbha ya i warim hadooh wow pynheh ya iwa da em chwa deiwa booh hi da ki wakreh kiwa da em chwa wei kani ka poisa wa da pynlait kynthup ko nadooh wow thied ya ki Generator, dawai hadooh wow chna pynheh ya ki thaw sumaar deiwa bichaar iyi wa emkaam wow leh nyngkong.
Da pyntip chooh chooh u wa kani ka T. 75 Klur toh ka bhah nyngkong wa da pynlait da montri rangbah ka jylla wei dang em sa le bhah wa daw pynlait heiwa ya kani ka poisa toh kawa yoh naka World Bank.
