Ka chnat Food Civil Supplies & Consumer Affairs ka sorkar Meghalaya da wanrah ko ki laad ki luti wow yada nei ku dor ki mar wa emkaam man-ka-sngi.
Da ong wa ka sorkar da chimkhia ko yei sñiawkhia kiwa chong chnong yei kur dor ki jhoor, u khoo wa kiwi de ki mar neibhah wa ktah ko ya ki paidbah wei neiliang ka sorkar da yaleh ko kammon wow khang yeini.
Heiyatoh wa i ku dor kini ki mar da ong wa i slem wei i wym em biang i rukom hiar slap ha kylleiñ ka ri heiwa da em ki thaw tang u slap leh ym em yoh ki da ktah ko ya ki jhoor, u khoo katwa ha kiwi won ki thaw da joor u slap hadooh wa da wanrah yei chlai um heiwa da dooh ya iwa dadep rep wei i boon bru ha India iwa da tam 1 Billion ngut da wanrah ko leh yei duna ki mar baam iwa da pynman yei ku dor wei i rukom man ka Meghalaya da ktah ko leh yow pynpoi pyndap ya iwa emkaam ki bru.
Chooh chooh da ong leh wa i ku dor ka nong sngi ki bru wa kreh mylla deilang ka bai kit da ki kari da ktah chooh chooh ko yeini wei ha Meghalaya kawa man ka thaw ri-loom da sy’at dor bha i bai kit iwa da hap su da ki paidbah wei da jia ini neidaw wa kiwa boon ki mar toh kiwa da chaniah na kiwi ki jylla ka ri iwa ktah yei dor.
Neiliang ka sorkar jylla da pynkrehkaam ko da ka Price Monitoring System (PMS) ha waroh ki District yow pynlang pynlum yei dor (Wholesale wa Retail) ki 22 tylli ki jait mar wa emkaam man-ka-sngi yow yada ya ki paidbah nei ku dor.
Ka sorkar India leh da pynku na ki 22 tylli kini ki mar cha 38 tylli kiwa hap wow pait bha yei dor nadooh ka 01-08-24 iwa mut da em sa 16 tylli ki jait mar wa em hapoh ka Consumer Food Price Index (CFPI) yong ka Consumer Price Index (CPI) wa pynkrehkaam da ka Ministry of Statistics & Programme Implementation.
Ha Shillong, Tura, Jowai, Sohra, Mairang, Nongpoh, Khliehriat, Nongstoin, Mawkyrwat wa Williamnagar da pynkrehkaam ya kani ka Price Monitoring System (PMS) yow pyntikna wym em ku palat yei dor wa da booh da ka All-India Rate of Essential Commodities.
Da thung leh ki Price Monitoring Committee ha ki ar kyrdan kitæ ka State Level Price Monitoring Committee wa ki District/Sub-Divisional Vigilance Monitoring Committee.
Yei dor yong waroh kini ki mar wa emkaam da pynlang hapoh ka Price Monitoring System wei kiwa ye u pait man-ka-sngi deiwa lai ha ka Website https://megfcsca.gov.in.
Ka sorkar da kular ko leh wa chimkhia ko yeini neibynta ki paidbah yow lait ki wow chah ktah deiwa khang leh ya kitu kiwa murieh ya kini ki mar, kiwa dai Black wei kiwa pynku dor, heijooh i por leh yow lait u duna kini ki mar wa emkaam ha ki yaaw ki haat.
Discussion about this post