I pynbait yow yoh thaw noh jhep ya ka chong Jowai da tyngkhooh ko yei eh wa harukom nadooh u Kmaichonglad (Dec) 2015 hadien wa kyrriah nyngkong ya ka thaw noh-jhep wa em ha Pohsatakhap iwa harood u sarok Jowai-Dawki wei da rah cha iwi won i thaw thymme iwa em cha chiliang yong ka wah Mynkjai iwa ym em jngai tang chi Kilometer leh na i thaw warim tangwa rap jngai hi-eh i na rood sarok.
Hadien ini da mih won sa i pyrchah yei noh-jhep ha ini i thaw da ki chnong wa em chajan hadooh wa da sahkut i jhep ha chnong Jowai ha uni u snem heiwa neiliang ka Jowai Municipal Board da pyrchang ko wow lai noh-jhep cha thaaiñ Lamyrsiang, EJH heiwa da chah beh neidaw wym chah ki tre thaw kamjooh leh khlem da tip ka chnong ka thaw.
Hadien ini da yaklam biang wa ki chnong wa pyrchah wow noh jhep ha Mynkjai yow chah biang u noh-jhep chipor heiwa da e por 3 bnai heiwa neiliang ka sorkar leh da pynbna paidbah ko wa kwah ko wow thied ya 50 Acre i thaw yow pynman kam ka thaw noh-jhep ya ka chnong Jowai.
Hadien ini ha ka yalang wa pynman ha Jowai, neiliang u Wailadmiki Shylla da pynbna u wa da yoh thaw noh-jhep wa heh 100 Acre wei ym duk de u khuslai sa 50 snem.
Ha ini i thaw wa thymme wa katni wa tip kam i Moochutsdai wa em ha chnong Sohphoh hadien kamwa chi bnai wa da sdang noh jhep da mih biang i pyrchah ha ini i thaw deiwa e daw wym em biang i rukom noh jhep, iwa daw ktah yei chait i khiah kamjooh leh ym em pynman ya ka yalang paidbah yow paan bor.
Kiwa chong chnong da ong ki wa boon toh ki wym tip yeini wei da leh du hapyrdi ki Waheh Chnong wei kammon dei jhep wa na Jowai da wan noh cha chnong yong ki i wym sñiaw yahaap ki kamtæ da khang ki ya ki Truck ka JMB heiwa da phah liwan ki na kani ka thaw iwa da pynman won ya u DC wow pynmih hukum wow pynkrehkaam ya ka Section 144 CrPC yow khang wow pynman yalang, ki yakhih hajan ini i thaw noh-jhep. U DC da phah u leh ya ka JMB wow bood ya ki kyndon aiñ hawa noh yei jhep.
Ini da booh ko hei eh ya ka sorkar ha iwi i liang u pynhun yei dawa kiwa chong chnong ka Jowai wow kit noh yei jhep heiwa ynne ka sngi Christmas ha Iawmusiang hajan ka yung krehkaam u DC wa ha laad Thomas Jones Synod College ym em kit yei jhep da boon sngi katwa ha iwi i liang da em kiwa chong chnong kiwa da pyrchah yei noh-jhep wei lada leh yabor ym dam u mih i kulmar.
Kammon u lai chakhmat neibhah i pyrchah u mih bait lada i noh jhep dang man hi i du deiwa thang donhi yei jhep neibhah i thaw wa noh jhep katni toh iwa em ha khlieh loom wei iwa man khloo wa boon ki dieñ wei yow yoh thaw wow noh jhep daw hap pynmadan yeini i thaw i wym pu em dep ka sorkar wow thied ki wei dang da chim wai donhi.
Yei thaw noh-jhep yong ka Shillong ha Marten leh da mih i pyrchah na ki chnong wa em chajan wow kyrriah noh ki wei waroh ini i pyrchah hi toh neidaw wa sma iwa em hakhmat dooh i daw wa pyrchah ki bru.
Kat wym pu yoh hi u chna dei thaw wa man kam ka juk wa katni wow pynlang yei jhep, lada em kiwa chah u noh jhep leh, hadien kattu katni i por daw poi biang chei pyrchah wei i jhep daw lang ma lang i.
Boi deiwa yoh thaw deiwa em pyn ha Jowai hi deiwa yoolang waroh yei rukom pynlang jhep wa man katkam ka aiñ yow lait u pynkit cha kiwi ki chnong daw pynwiar yei pyrchah wei daw wanrah leh yei kitkhlieh ya kiwa chong chnong kammon pynmih ki yei jhep neibhah nei jhep ye leh wow chna sboh wei ya kiwi ye wow Recycle wei lada i thaw noh jhep man i cha jngai ym em wow chimkhia wow pyrkhat kammon jia yei jhep chisien wa da kit na yung.
