Yieñ jor khynroo khyllood

Ham ong wa dooh tæ wym em laad,
Yieñ skem hei rai pyrkhat;
Tip phi oo u Booker Washington?
I im yong oo u man ki kammon.

Tang ka sleit moothoh wym yoh u pli!
Da u rngaw sikai ABC;
Waroh ka pyrthai i naam wa bna,
Uwi na ki bru stat ka America.

Akor salon se wa sarot tam,
Wow rah ya phi cha kliar i naam;
Hei puræ puthi u ku chakhmat,
La kut yumut daw wai ka laad.

Chiboon ki bru khroo ha pyrthai,
E ki ha i i sneiñ i sikai;
I im yong ki man nongmuna,
Yoh i u tip u bood nuksa.

Samen samen nga wa pyrkhat,
Wymtoh wa dooh tæ dooh yei stat;
Yoo O hei biej duk i u sah,
Tæ neidaw wa chukor ka spah.

Neidaw wa boon spah wa mahajon,
Kylla noh i ki khon yoh mon;
Manda yoh lut kat iwa kwah,
Puræ puthi te da sah chrah.

Lada lait du kat Matric, BA,
Pyrthai katni tæ emkaam de;
IAS, IPS, IFS
Kat cheitæ se booh thong u yaleh,

Khai lok nei doom na rnem,
Yei naam u thooh hadooh wa chem;
Du uwa ye chah yei jynjar chitom,
Wa chonghok chongñia u yoh burom.