U Lahkmen Rymbui uwa man leh u Montri ka chnat puræ puthi ka jylla, da ong u wa ka sorkar da klam che ko nadooh u snem 2018 hadooh 2020, wei katni ym emkaam de wow klam yei jooh chi jooh heiyatoh wa i dawa kiwa sikai skur Contract kiwa ym em Pass ya ka Meghalaya Teacher Eligibility Test (MTET), kiwa dang yakhih hadooh ynne ka sngi.
Da ong u wa heipor wa ka sorkar hap pynkrehkaam ko ya ka National Council for Teacher Education, da dep klam che ko wa neibynta wow chah thung kreh pura hap pyndep ki katkam ki kyndon. Da ong u leh wa nadooh nyngkong ka sorkar da klam che ko wa i thung kreh pura ym em ko lada ym Pass katkam wa da booh.
U Lahkmen da ong chooh chooh u wa ka sorkar da pyrchang ko leh wow yarap heiyatoh wa i rta kiwa sikai wei ka chnat toh ka chnat kawa nyngkong wa pynyinsur yei rta thung kreh na ka 32 snem cha ka 37 snem wow e laad ya kiwa sikai, wei wow e laad leh ya kiwa da em 40 snem kiwa da em chwa hei kreh.
U Montri da pyntip u wa kiwa boon kiwa sikai Contract kiwa da Pass ye wow chah tung kreh pura, wei kiwa sikai kiwa dang yakhih katni, ka sorkar ym kwah de ko wow klam i jooh chi i jooh, neibhah ka chnat dadep pynbiang lut ko ya ki Roster yow ye u khut thung kreh noh ha ki thaw wa lait.
