Ka High Court ka Meghalaya ha ka 5 tarik uni u bnai da rai ko wow pynksan yei phah kset 25 snem ya u Julius Dorphang uwa man kam u MLA warim ka Mawhati kamjooh u Chairman warim ka HNLC hajrong i kaam wa yatoh wa i slaitbor u ya ka khynnah kynthai kawa dang kamwa 15 snem i rta.
Kam wow pynkynmoo wa ha u Naisaphra u 2021, ka yung bichaar u Special Judge ka POCSO Court Nongpoh da phah kset ko ya u Dorphang 25 snem heiwa neiliang u Dorphang da lai rah u ya ini hakhmat ka High Court yow kyrpaad pyndam ya kani ka hukum wow phah kset ya oo.
Kamtæ ka High Court hadien wa da dep chong bichaar bniah ya kani ka mukotduma u Julius Dorphang da chem wa da biang ki sabut wow pynyoo wa emkti u ha ini i kaam ym du chisien tangwa da slaitbor u arsien ya kani ka khynnah.
Kani ka khynnah heipor wa em ko 14 snem da chah phon ko ha kawi ka bru Nepali wow yut na yung ko wa em ha Ichamati yow lai sah noh wa ka ha Shillong hadien wa ka bei u pa ko wym bien de ki wow pait ka wei da pyndam ki leh wow lai skur ko.
Ha Shillong won da lai booh ya kani ka khynnah wow sah ko wa kawi ka manyung Muslim wa em ha Demthring, Shillong.
Hadien ar bnai wa sah ko wa kani ka manyung da yah ya ka cha iwi i Guesthouse wa em ha Motinagar, Shillong heiwa da e ya ka wow dih yei jiat wa da pynmuiad pynlot ka wei ha ini da chah slaitbor nyngkong dooh ko ha u bru wa dang kynmoo dur ko wei da yah biang ka sa chisien cha uni u jooh biang u bru ha Umiam Lake Resort heiwa da chah slaitbor biang ko.
Kani ka khynnah da chah chim kabu ko da kiwa ri ka ha Shillong kiwa da lai dai ka leh cha kiwi ki bru wei ha kawi ka sngi da yoh ko wow yut na ki wei da lai paan yarap ko na ki arngut ki bru wa tipmit ko kiwa da lai yah ya ka cha Laban Police Station.
Neiliang u Julius Dorphang da ong u wa kani ka khynnah ymtoh kawa dang khian rta heiwa neiliang ki pulit da khut ki da u Radiologist, ka Dentist yow pynsakhiat yei rta kani ka khynnah deilang wa na u pa ko wei deiwa kheiñ yei rta u diah ko kamjooh i lamien ko da pyntikna wa da em ko hapoh 16 snem heipor wa jia ya ka ha Umiam ha u snem 2016.
Yei em u Julius Dorphang ha Umiam Lake Resort da pynsakhiat da kiwa kreh ha kani ka thaw kiwa da ong wa wan u cha kani ka thaw man-i-por kamjooh leh uwa yah kari ya oo uwa da khana wa lai booh u ya oo cha ini i thaw man-i-por.
Hawa leh ya ka Test Identification Parade yow pait lada ye kawa chah slaitbor u jied ya u bru wa leh ya ini i kaam, da kdaw ko ya u Julius ha waroh le sien wa da leh ya kani ka Indentification Parade.
Hajrong kini deilang wa kiwi de ki sabut, ka High Court da rai ko wow pynksan yei hukum ka POCSO Court Nongpoh wow phah kset 25 snem deiwa ong wa katni u Dorphang uwa em 52 snem kat u lait u daw duna i kwah brai u wow leh ya ini i jooh i kaam.
Da phah leh wow su u ya ka kuna wa T. 15 lak wei lada ym su u yeini, daw hap wow kset deiwa pynchitom joor bha sa 5 snem.
Da phah leh ya ka sorkar jylla wow pait wow sumaar ya kani ka khynnah hadooh wa dap ko 25 snem wei toh u e yarap ka sorkar ya ka T. 5 lak najrong ka T. 15 lak wa toh u yoh ko lyngba ka kuna.
Ka yung bichaar da ong ko leh wa i kam ka imlang sahlang toh u paan maap i na kani ka khynnah kawa chlur wow wan chakhmat hadien wa i kam ka imlang sahlang ym ye i wow yada ya kiwa dang khian dang kordor.
Ka yung bichaar da ong ko leh wa hap wow thooh ya kani ka bru Nepali wa ka manyung wa chim kabu ya kani ka khynnah kiwa ym em mih pyrtuid ha kani ka mukotduma.
