Ka Meghalaya High Court da kyntait ko yei Appeal u Ram Dhar uwa da chah rai pynrem deiwa phah kset waroh chi rta heiyatoh wa i chah pynyap u Trebor Hinge ha West Jaiñtia Hills District iwa da jia ha u snem 2015 heiwa ya ka hukum phah kset da pynmih ha ka 15-05-24 da ka yung bichaar u Session Judge, West Jaiñtia Hills District, Jowai.
Ka miej bichaar ka High Court wa kynthup ya ka Chief Justice, ka Revati Mohite Dere wa u Justice W. Diengdoh hawa pynmih ya ka hukum ha ka 4 tarik uni u bnai da ong wa katkam wa chem ha ka mukotduma wa dep, ini da jia i ha ka 11-02-15 heipor kamwa 1:30 i sngi heiwa ya ka FIR da booh da u Kynjai Hinge, u diah uwa chah pynyap hadien wa pyntip yeiwa jia na ka Nika Thubru, kawa man kam kawa sakhi yeini wa jia.
Wei hadien wa takit ki pulit kamjooh hadien wa yoh ya ka Post-Mortem Report da Charge Sheet ya u Ram deiwa pynngat hapoh ka Section 302 ka Indian Penal Code.
Ka Sessions Court leh da rai pynrem ko hapoh ka Section 302 IPC deiwa phah kset waroh chi rta deilang ka kuna wa ₹5,000 wei da phah leh wow su poisa yarap ₹3 lak cha ki bei ki pa uwa yap hapoh ka Section 357A ka Code of Criminal Procedure.
Heipor wa bichaar da khut ya 6 ngut kiwa ma kam kiwa sakhi wa kynthup ya u diah uwa yap, kawa sakhi ka Nika Thubru neitæ u Medical Officer, u VDP Secretary wa u Retired Scientific Assistant deilang u Investigating Officer.
Ka High Court da ong ko wa iwa jia chah pynmsoo u Trebor Hinge hadooh wa yap ym em wa kyntait ki heiwa ki dak ki chin da chem wa em ki kha wa chah dung boonsien, wei em leh ki chyieñ chrooh kiwa da kheiñ.
Kamtæ da ong wa iwa emkaam u bichaar toh lada u Ram Dhar toh uwa emkti wow leh yeini i kaam.
Ka yung bichaar u Session Judge da ap ko yeiwa khana ka Nika Thubru, kawa da ong wa u Ram Dhar da kdong u ya u Trebor Hinge deiwa rah tari wei manda chem u oo da dung u oo wei manda yoo ko yeini da lai pyntip ko cha kiwa emyatoh uwa chah pynyap.
Da ong leh wa ini iwa khana ka Nika yahaap i wa iwa chem ka Medical Report wei ym ye wow kyntait yeiwa da khana ko.
Wei najrong ini da chem leh ya ka wait tangwa ym em da chaniah yeini neidaw wa da chem ka na yung u ma u Ram Dhar. Tangwa da ong wa kawa sakhi yeiwa jia da pyntikna leh da ki sakhi Medical Evidence.
Kamtæ ka High Court da kyntait ko ya kani ka Appeal wei da pynskan ko ya ka hukum wow kset waroh chi rta kawa da pynmih da ka yung bichaar u Sessions Judge, West Jaintia Hills District, Jowai.
Ka High Court da phah ko leh ya ka District Legal Services Authority, West Jaiñtia Hills District, wow wanrah ka Report lada dep su næ ym pu em ya ka ₹3 lak cha ka bei u pa u Trebor Hinge wei daw chong bichaar biang yeini ha ka 2 tarik u bnai wow wan.
Discussion about this post