Ha iwi i jia ya tyrrah kari iwa da jia haka 15 tarik uni u bnai ha chnong Sumer, Ri-Bhoi heiwa kawi ka Truck da lai ko wow tyrrah ya kawi ka kari Mahindra Thar hadooh wa katai ka Thar da sied ko cha kawi ka dukan iwa da pra phrai wei hadien ini kani ka Truck da lai tyrrah ko sa ya kawi ka Auto Rickshaw wa em Number ML-10C-8814 kawa em ha rood sarok.
Ini toh iwa da jia hei janmiet heipor kamwa 4:00 waje wei katai ka Thar toh kawa em Number ML-05-AB-0028 kawa yah da u tre deiwa emlang wa ki paralok yong oo kiwa dang sangeh ha rood sarok yow thied tiar, wei kani ka Truck wa em 12 chaka wa em Number NL-01N-5423 toh kawa da pynhær bha kawa wan neiliang Shillong yow lai cha Guwahati.
U tre ka Thar toh uwa tip kam u Dapbor Syiemïong uwa chong wa sah ha Mawlai, wei ya katai ka Auto Rickshaw da mantre da u Gentlemen Thangkhiew uwa chong wa sah haka chnong Nongpoh Pahamsyiemkam tangwa yei pyrtuid uwa yah ym pu tip neitæ ka Truck da mantre da u Umar Shankar Singh wei ya katai ka Truck da e u wow pynemkaam da ka Friends Transport Company.
U tre ka Thar da pyntip u wa hapoh ka kari u da emlang ki 3 ngut wei kani ka Truck da wan ko wow tyrrah ki nadien hadooh wa sied ki chapoh kawi ka dukan tangwa da embhah wym em jia iwa sñiawsih ya ki lait nei takha malu mala tangwa ya uwa em hapoh ka Auto hadooh katni da em u hei chah sumaar.
Heiyatoh wa ini da lai ujor daka FIR ha Umiam Police Station pyrchah ya katai ka Truck hadien wa u tre ka Truck ym bien u wow bahkhlieh yei mynsoo yong ki bru, i sih ki kari wa kamjooh i dukan. Da khana ki leh wa ini i rukom tyrrah kari da jia bha i ha kini ki sarok neidaw wa kiwa yah kari toh kiwa muaid wei da pynbaad ki leh wa uni uwa yah ya kani ka Truck toh uwa da muaid.
Neiliang yong ki da kyntu ki ya ki bor pulit wow chimkhia ya ini i kaam khnang wym jia ya kiwi won wei da kyntu leh ya ki pulit wow pait bniah bha ya kam ini wa yah kari deiwa muaid yow lait nei jia wa sñiawsih.
Discussion about this post