Ka seiñ Hynniewtrep Youth Council-Amlarem Unit da rai ko wym chah de ya kiwon kiwon ki baar jylla wow wan chong wan sah næ kiwa lai wa wan næ kiwa mylla ha chnong Amlarem wa ha ki chnong wa marjan kam ka Amlatdoh, Krangpamtadong, Amshipai, Amsarim wa Skhentalang neidaw u khñiang COVID-19.
Hadien wa ka seiñ da dep pynman ko yaka yalang wa jhan wa ki waheh chnong yong kitai ki chnong wow pynsñiawthooh yaki hajrong utai u khñiang kjut ha i emlang yong u Medical Officer u Dr. Arvin Khonglah uwa pait ya ka thaaiñ Amlarem, da batai u yaki chaphang i ma yong uni u khñiang wei kammon wow yada pyn daki yaki hi yow lait na uni u khñiang kjut.
Neiliang u Secretary ka seiñ HYC Amlarem Unit u Bonanza Shylla leh da phah u ya ki waheh chnong wow paitbniah wei wow pyntip wut wut lada em kiwon kiwon ki baar jylla wa wan cha ka chnong yong ki cha Police Station næ cha u Medical Officer næ cha ka seiñ.
Ka seiñ da kyrpaad ko yaki paidbah yong ka thaaiñ War Jaiñtia waroh kawi wa lada em ki bru yong i wa wan na baar ka jylla wow sñiawbha ym toh u mih de wei wow chong bait hapoh yung hadooh 15 sngi lynter khnang wow yada phi pyn da phi yaphi hi wa ya kiwa ha yung ha sem yong phi wa ka chnong ka thaw yong phi wei lada sñiaw chitom wow pyntip wut wut ym toh wow murieh khnang wow lait na i poor uni u khñiang kjut.
Ha i jooh i por ka seiñ leh ka maham joor ko ya ki dukan hapoh Amlarem wa dai syad kam ya ki Face Mask wa ki Hand Sanitizer wei lada ka seiñ chem ko, daw leh ya iwa emkaam.
Discussion about this post