Jowai: Chibynta i kynmoo yaka sngi wa pyrchah yei pynkih pynkreh mylla yaki khynnah, næ kawa tip kam ka World Day Against Child Labour hajrong ka phang wa ong “Children shouldn’t work in Fields but on Dreams” neilang ka District Legal Service Authority, Jowai leh ynne ka sngi da chim ki wow pynkynmoo ya kani ka sngi, hei yakrehlang ka yung krehkaam ka chnat Labour, Jowai ha Loompyrdi, Mihmyntdu.
Ka B. Toi, Labour Inspector da e ko i pynche heiyatoh waki aiñ wada khang pyrchah wym hoi u yoobeiñ næ pynkhih pynkreh yaki khynnah wa dang hapoh i rta 14 snem, neibhah hapoh kani ka rta dang toh u lai skur ki yow yoh i tip i stat, wei neiliang ka sorkar leh da pynbiang ko yaki skur, ki kot wei ja sngi ha man ki chnong ki thaw wot chadooh nongkyndong khnang wa kitu wa wan na yung wa dooh leh u yoh bynta ki.
Katwa i yarap ki khynnah yaki bei ki kpa næ kiwa ha yung hei yatoh waki kaam yung næ ki kaam khayi won toh u keh hadien wada wan skur næ heipor chuti wym toh ka kaam wa pyrchah aiñ, ong ka B. Toi.
Kamtæ lada ka yungkrehkaam yong ki chem ko ya kiwon kiwon wa pynkreh mylla yaki khynnah wa hapoh i rta 14 snem ha kawon kawon ka thaw daw pynchitom yaki katkam ka aiñ.
Neiliang u D.S. Marbaniang Secretary District Legal Services Authority West Jaiñtia Hills District da ong u, hapoh 14 snem wym pu toh i por yaki khynnah wow kreh yaki kam wa eh neibhah dang toh i por wow pynemkam ki yei bor jabieñ hei puræ puthi wei kam ki bei ki pa leh toh u e laad yaki khon wow mansakhiat iwa angnood ki u man.
Kamtæ i pynman ya kam kani ka sngi yooluti u wow yarap ko ya kiwa boon yow sñiawthooh heiyatoh u pyndooh jait yei pynkhih pynkreh yaki khynnah.
Kiwi won wa e i klam kynthup u Abul Phawa waheh chnong Mihmyntdu pyllun haka yalang wa pynlai da u Jrum Biam, waheh chnong ka Loompyrdi Mihmyntdu, hei emlang ki khynnah skur, kiwa sikai wa kiwi kiwi.
Discussion about this post