I yaklam hapyrdi kiwa yahkhmat ka Khasi Students’ Union (KSU) wa ka sorkar ynne i janmiet ym em poi i cheiwon cheiwon hajrong ka Meghalaya State Investment Promotion & Facilitation Act (MSIPF), heiwa ki heh ka KSU da ong ki wa ym hun ki yei jubab ka sorkar.
Hadien wa da ki spah ngut ki dkhot ka KSU da tia ki cha yung dorbar chna aiñ ynne i step wow pyrchah ya ka aiñ MSIPF, u Montri Rangbah ka jylla, u Conrad K Sangma da khut yaklam u ya ki heh ka KSU hei janmiet, heiwa da emlang u Symbood Montri Rangbah, u Prestone Tynsong deilang u Chief Secretary, u DP Wahlang wa kiwi ki heh sorkar.
Hawa yaklam wa kiwa pathai khubor, u President ka KSU, u Lambokstarwell Marngar da ong u wa ka seiñ ym hun ki ya i yachem neibhah ka sorkar ym em e ko iwon iwon i kular wa dei thoh wei u Montri Rangbah da kular u du i ktien wow bichaar bniah biang ya kani ka aiñ wei wow wanrah yei kylla ha ka dorbar wow man ha uni u snem deiwa chimlang yeiwa pynsñiaw waroh kiwa embynta wa kynthup ki seiñbhalang.
Da ong u wa ka seiñ ym chaniah ko yei kular ka sorkar iwa du dei ktien wei ka CEC daw chong pyrkhat ko hajrong kani ka aiñ neibhah ym kwah ko wa ki aiñ wa ka sorkar wanrah ko wow man ki u moochynthut wei pyndooh myntoi ya ki tre ri.
Discussion about this post