Ki pulit ka East Khasi Hills da kem ki ya u bru wa 24 snem i rta uwa na Assam heiyatoh wa ki ar tylli ki kaam khlemakor wa da leh u ya ki khynnah skur ha Shillong wei man u leh uwa jooh leh ya kam kini ki kaam ha Assam.
U Superintendent of Police ka East Khasi Hills, u Vivek Syiem da ong u wa ha ka 24 tarik da poor i Video heiwa da yoo ya u bru wa sap Mask wa khyndang u ya ka Skirt ka khynnah skur wei da chondur u da ka Mobile Phone.
Neiliang ki pulit da thung ki ya ka Special Team ha ka 26 tarik wa yahkhmat da u Additional Superintendent of Police (Operations), u Ivan B. Diengdoh heiwa da chem wa ini da jia i hajan YWCA ha Umsohsun ha ka 23 tarik heipor 6:35 i step.
Ki pulit da yachem ki ya kani ka khynnah wei da ujor First Information Report (FIR) ha Lumdiengjri Police Station hapoh ki kyndon ka Bharatiya Nyaya Sanhita (BNS) wa ka Protection of Children from Sexual Offences (POCSO) Act.
Da pyntip leh da em kam ini wa da jia ha ka 19 tarik heipor 7:15-7:30 i step ha ki rana wa em hajan Dreamland, Police Bazar heiwa kawi ka khynnah da chah leh khlemakor ko wei da ujor leh ya ka FIR ha Sadar Police Station hapoh ki kyndon ka POCSO Act.
Kani ka Special Team hadien le sngi wa da thung ya ka da ye ki wow tip yei pyrtuid uni u bru uwa tip kam u Himan Gogoi (24 snem) uwa na Jorhat, Assam wei ha ka 28 tarik ki pulit wa yahkhmat da ka Woman Police Sub-Inspector, ka Lavinia Kongwang da lai ki cha Jorhat yow lai kem ya uni u bru deiwa yoh yarap na ki pulit ka Lahdoigarh Outpost.
Ya uni da yoh wow kem na i yung kiwa emyatoh u iwa em ha chnong Bamkukurachua iwa dang haap hapoh ka Teok Police Station, Jorhat heiwa na u Himan da yoh leh ya ka Mobile Phone wa pynemkaam u chirup wa kiwi ki sabut.
Uni u bru toh uwa da em Case chwa pyrchah ya oo hapoh ka Teok Police Station wa emkti u wow leh khlemakor ya ki khyntai.
Ya u Himan daw wanrah cha Shillong hadien wa pynmih ya oo ha District Court ha Jorhat.
Discussion about this post