Ka Meghalaya & Greater Shillong Progressive Hawkers & Street Vendors Association (MGSPHSVA) da pyrchah joor ko yei klam yahbakla u Montri ka chnat Tourism, u Paul lyngdoh hawa pynuiñ ktien ya kiwa chongdai madan kiwa da dawa wow pynkrehkaam ya ki kyndon yong ka aiñ kawa yada yei kamai ja-kpoh yong kiwa chongdai.
U Paul da ong u wa dadep khut yalang dep ya syllok wei da thung leh ya ka Committee tangwa ka seiñ kiwa chongdai da ong ko wa u Montri ym tip u iyi iyi chaphang ka aiñ.
Kani ka seiñ da ong ko leh wym embynta ko ha kitæ ki yalang wow pyrkhat wow kyrriah ya kiwa chongdai madan na Khyndailad. Deiwa ong wa ka aiñ ‘The Street Vendors (Protection and Regulation of Street Vending) Act 2014’ toh ka aiñ wa chongnia nadooh wow leh ya ka In Situ Survey yow thung leh ya ka Provisional Town Vending Committee. Wei du hadien wa pyndep ya ini waroh katkam ki kyndon ka aiñ wei wow e Certificate ya kiwa chongdai madan wow sdang won sa ka Town Vending Committee (TVC) kawa pura heiwa 40% ki dkhot toh u man ki napyrdi kiwa chongdai madan.
Ka TVC won toh kawa em hok wow chna ya ki Vending Plan, yow kdaw ya ki thaw wow chong kiwa chongdai madan, i por wow chongdai wa kiwi de ki kiwa emkaam.
Chooh chooh da ong wa u Montri toh u tip u wa ki yaaw kiwa da rim wa ki yaaw kiwa mih kamtu nadooh ka Khyndailad, Iewduh, Bimola, Laitumkhrah, Rynjah wa kiwi de, ym ye wow khang ya kiwa chongdai madan wow chongdai ki.
Kamtæ da ini i pyrchang wow khyndang yabor pyrchah aiñ ya kiwa chongdai daw ktah ko yei yoh i kot yong ka sor Shillong.
Da pynkut deiwa khut ya u Paul Lyngdoh wa kiwi de ki heh sorkar cha ka e sikai wa kyrpang yow tip bniah ki chaphang ka aiñ ‘The Street Vendors (Protection of Livelihood and Regulation of Street Vending) Act 2014’ wa kiwi de wa emkaam u tip ki chaphang ki kaam pynroi wei wow pynmiat ya ka sor.
Discussion about this post