U Lalrinzuala Thieite u General Secretary yong ka National Students’ Union of India (NSUI)-Jaiñtia Hills da ong u wa ka NSUI sñiaw ko wa ka sorkar MDA ym bna ko yaka Jaiñtia Hills hajrong i thaw leh Quarantine wa em ha JNV, Mukhla wa ym em pynkhreh neibynta kitu ki khynnah wa wan na baar ka jylla, wym biang i rukom sah wa i rukom e baam ya kiwa leh Quarantine.
Da ong u wa ka sorkar heh ko du hei kop donhi wei katkam ini wadep hawa klam u Deputy Chief Minister u Prestone Tynsong da ong u wa ka sorkar dadep pynbiang ko nadong chadong yaki thaw sah kitu kiwa wan na baar jylla tangwa manda yoo ya i rukom man i thaw sah ha ki Video man i iwa yoo wryai ya kitu ki 12 ngut ki kynthai wa sah heitu wa ym em biang nadooh wow e jar jiar ki kamra wow sah, i baam i dih wa toh rukom wa tei yei doh i pran, wei katkam i poor ka khubor wa kini kiwa sah yoh ki du u khoo, u dai, salah wa u piat. Ka seiñ da ong ko wa hei yongsakhiat ka sorkar toh u e ko dei baam kam ki pylleiñ, i dud, dakha, wa kiwi kiwa pynkhlan yei doh i pran.
Chooh chooh da ong leh i wym burom ya kiwa leh Quarantine da kitu kiwa pait wei pynemkam daki ktien wa khor ya ki da pyndooh mynsien ko ya kitu khynthai wa sah heitu wot ya waroh hi kawi ka Jaiñtia Hills. Weiwa lada em kiwa em ki dak ki chin wa chitom ha kini kynthai kiwa sah heitu, ka sorkar toh u bah khlieh ko nadong chadong wa toh kam ini wa da dep da em kawi ka kynthai wa yoh ya uni u khñiang kawa wan na Agra, Uttar Pradesh wa da sah lang ko wa kini ki 12 ngut.
Kamtæ ka seiñ da ong ko waka lyngba ka Health and Family Welfare toh u pait bha ko ya kiwa sah na i por cha i por khnang yow lait na iwon iwon i jia hapoh Jaiñtia Hills, wei toh u pynbiang lut ko ya i emkaam yong kiwa sah.
Ka seiñ da kitbok kitrwiang ko ya katu ka kynthai wa yoh ya uni u khñiang wow yoh ko yei chait wei kitu kiwa sahlang wym hoi u em ki hei tieñ wei sñiawsih wei toh u chlur, u sumaar bha ki ya idæ. Wei kular ka NSUI u emlang bait ko waki heiwon heiwon i por lada ym yoh u wow emlang tangwa da i mynsien wa da i duwai Blai.
