Ha ka yalang yachem ki Montri Rangbah ka thaaiñ Northeast wa u Montri kaam pohyung ka ri, u Amit Shah wa da pynman ynnin ka sngi ha Shillong. U Amit Shah hei klam yong oo da ong u wa ka thaaiñ Northeast ha kini ki 7 snem nadooh wa man u Narendra Modi kam u Prime Minister, ka thaaiñ da man ko kawa da ku bha hawa nujor ha ki 70 snem nachwa.
Da ong u wa nachwa manda poi i yaklam chaphang ka Northeast da yaklam bait heiyatoh ki seiñ kieñ suloi, i psiah tooh chapoh ka ri wa ki kaam baam-tooh tangwa katni da klam chaphang ka roi, ka paar, i pynbiang ya ki luti ki syngkieñ wei hapoh i yahkhmat u Modi da ye wow pynbait ya u pood wa ka Bangladesh, i wanrah yei yasuk wa ka NLFT, i yatoh wa ki jaitbru Bru kiwa da sah wiar ha Tripura wa Mizoram wei da wanrah leh yei yasuk ya ki Bodo da ka Bodo Peace Accord.
Da ong u leh wa ym em booh pood hadooh katwon u booh bhah ya ka poisa neibynta ka thaaiñ Northeast tangwa toh u pynemkaam hok ya ka poisa. Lada ye u poi cha ka thong kamwa da mang, ka sorkar India ym em eh ya ka wow pynlut poisa ko.
“Lada toh hei phah ya ki kor Ventilator, ki tadong Oxygen wa ki dawai, nyngkong da pyrkhat ya ka Northeast kamjooh leh yei e tika da booh ya ka Northeast hakhmat,” da ong u Shah deiwa pynrap wa emkaam wow pynboon ya ki thaw leh Test yow pynhiar ya ka Positivity Rate.
Da klam u leh yei emkaam wow pynman ya ka Northeast kawa lait na ki sieñ kieñ suloi deiwa yaroh leh yeiwa da kylla wei da chngaaiñ ka thaaiñ ha kini ki snem deiwa banjoor yei emkaam wow wanrah yei chongsuk chong saaiñ. Deiwa kyntu leh ya ki Montri Rangbah ka jylla wow pynbait noh ki ya u pood u ang.
