Ka Jaiñtia National Council (JNC) Khliehriat Circle ha ka 17 tarik uni u bnai hapoh i yahkhmat u General Secretary, u Symboh Sumer da lai ki wow booh dei thoh ha ka yung krehkaam u DC ka East Jaiñtia Hills District, S. Awasthi yow kyntu ya ka chnat krehkaam heiyatoh wa u sarok NH-6 khamtam ha Khliehriat kawa da dap katni sa du i laphooh wa mih na uni u sarok khamtam ha ki por lai skur wan skur ki khynnah neibhah ini ye i wow ktah lut ya waroh ki yung ki sem, ki dukan, khamtam ki khynnah wa ya waroh hi ki bru kiwa lai lyngba uni u surokbah.
Ha i thoh, ka seiñ da pynbor ko leh ya ka NHAI wow pynchna smat ya uni u sarok neibhah neini chakhmat ka aiom leh da man ko kawa da biang yow pynchna noh kamwa ka NHAI da kular ko wow leh khnang yow man i myntoi ya ki paidbah wa lai lyngba uni u sarok.
Ka seiñ ha u snem wa dep da ujor ko chadooh ka Ministry of Road Transport and Highway kawa toh u pait yow dawa pynchna noh ya u sarok NH-6 wei neiliang ka NHAI da e jubab ko deiwa ong wa dadep wow phah ya ki ar tylli ki Contractor kitæ ka SL Infra Ltd waka MR Ltd yow pynchna noh ya uni u sarok nadooh Jowai chadooh cha Ratacherra.
Hajrong kani ka phang hawa yaklam wa u DC da kular u hakhmat ka seiñ wow leh yeiwa emkaam wei wow chimkhia yeini wa da dawa ka seiñ wei da ong u leh wa ini toh iwa biang neibhah i laphooh ktah ko ya ka lai ka wan khamtam ki khynnah skur wei da pynrap u leh wa daw phah ya kiwa toh hok wow pait ya ini i kaam wow leh ki yeiwa emkaam.
Neiliang yong ka seiñ da pynsñiaw ko yei sñiawngooh ya u DC wa smat u wow chimkhia hajrong ini i kaam neibynta i bha i miat ki paidbah.
Discussion about this post