Hawa yoh u Wyrta u yaklam wa u Montri Rangbah ka jylla heiyatoh waka Block-I hajrong i chah iehbeiñ bha ki khamtam ki chnong kiwa em hapoh ka Elaka Labang Nongphyllut heiwa da kylli na oo lada ini toh neidaw wym em i mon ha ka synchaar khadar (Political Will) da ka sorkar kawa katni wa ki sorkar warim.
Hajrong ini neiliang u Conrad da kubur u wa sakhiat heiyatoh wa ini i kaam wym em i mon ki sorkar warim tangwa kani ka sorkar wa yahkhmat ka NPP da chimkia ko yeini heiwa da soi ya ki soskular wow pynbait ya ki 6 tylli ki thaw wa em ha khappood.
Da ong u wa ini i kaam khappood toh iwa khor wa eh bha tangwa kani ka sorkar wa katni da chimkhia ko wow pynbait ya ini wei i kaam katni dang lai i chaphrang.
Chooh chooh da e nongmuna u ya ki chnong ha ka thaaiñ Tarabari kiwa em hapoh i synchaar ka Assam kiwa da rai wa kwah ki u em hapoh Meghalaya heiwa ka Assam leh da mynjur ko yeini heiwa wot ki skur wa pynlai da ka Assam da dooh ki ya kiwa sikai kiwi da lai noh chapoh ka Meghalaya hadien wa soi yaka MOU neibhah ka Assam da mih noh ko na kini ki thaw.
Wei kini waroh da ong u toh ki wym ye u leh ha ki 45 snem nachwa tangwa katni ha kini ki soo snem chiteiñ da ye wow leh wei dang em leh booh kiwa ym pu ye u pynbait du hapoh chi sngi ar sngi wei lada dang e laad ki paidbah daw pteiñ biang yeini.
Hawa kylli lada ye u khut pynman da ka Referendum namo u e yei hok ha ki paidbah wow rai cheiwon kwah ki wow lai, neiliang u Conrad da ong u wa kamwa jia ha Tarabari da sariem hi waka Referendum heiwa da kylli na ki paidbah heiwon kwah ki u em, wei manda kylli ya kiwa kwah u em ha Assam da em du kattu katni ngut donhi katwa manda kylli yi wa kwah u em ha Meghalaya da thai how wa waroh kwah ki u em ha Meghalaya wei ini toh i mon ki paidbah namo ka People’s Will iwa ym jooh em leh nachwa.
