Ka High Court ka Meghalaya ynne ka sngi da pynsñiaw ko yei wym em hun hajrong i lai i takit yeiwa jia heipor lai Rally ka Khasi Students Union (KSU) ha ka 19 tarik u bnai wa dep ha Shillong.
Ka miej bichaar ka Chief Justice Revati Mohite Dere wa u Justice Wanlura Diengdoh da pynsñiaw ki wa toh u pynsangeh yei lai paidbah hadien wa da pynbaad wa kiwa chimbynta da tyngkheiñ ki ya ki kyndon kam deiwa kah yei durkhmat wei rah ki deilang ki dieñ wa kiwi ki tiar wa da khang.
Ka yung bichaar da ong ko wa lada tuklar biang por, ym jia kamwa da jia hadooh wa chah ktah ki kari, ki mar mata wa ki paidbah.
Neiliang u Advocate General, u Amit Kumar da pyntip u wa dadep Register 22 tylli ki FIR wei da kem ya soo ngut kiwa kitkaam KSU. Da pyntip leh wa dang bichaar bniah ya ki Video na ki CCTV ha ki 22 tylli ki thaw wei kamjooh yei yaklam Phone ki 8 ngut kiwa da suba emkti.
Neiliang ka miej bichaar da kylli ko leh wa ileh kem du ya 4 ngut hawa da ki spah kiwa chimbynta ha ka lai paidbah heiwa da phah leh ya ka Special Investigation Team (SIT) wow kdaw ya kitu kiwa emkti wei wow pyndep yei takit.
Ka High Court da paan ko leh ya ka Report wa bniah yeiwa takit ki pulit, ki Video yong ka Rally katkam wa phah ka Supreme Court.
U Inspector General of Police (L&O), u Davis NR Marak, u SP ka East Khasi Hills, u Vivek Syiem wa ki Officer-in-Charge ka Sadar wa Lumdiengjri Police Station daw hap lai mih ki cha ka yung bichaar manda chong bichaar biang ha ka 7 atrik uni u bnai heiwa da phah leh ya ka sorkar wow e ka Report hajrong kani.
Discussion about this post