Heiyatoh wa pynmih khubor ki laad pathai khubor kiwa na Shillong wa kha khon ka manbei hapoh kari neidaw wa chah khloh u sarok ha kiwa kyrchaan ka Shree Cement ynne ka sngi, neiliang ka yung krehkaam u Deputy Commissioner ka East Jaiñtia Hills District, da kylli bniah u na u Block Medical & Health Officer, Saipung Block uwa man leh kam u Sr. Medical & Health Officer, Sutnga CHC heiwa da chem wa kani ka khubor toh kawa bakla.
Da pyntip wa kani ka manbei toh kawa tip kam ka Riniwanki Sukhlain kawa na Shnongrim, East Jaiñtia Hills District wei da kha ko yei khonboo ha Sutnga CHC ynne ka sngi deiwa pait ki Doctor wa em hei thaw sumaar.
Kani ka manbei da sooh khon ko heipor kamwa 4:30 ynne i step wei da pyntip cha ka ANM kawa da lai cha yung ko yow pait yei long i man wei da chim rai wow phah noh ya kani ka manbei cha ka Sutnga CHC.
Kamtæ heipor kamwa 8:30 i step da mih na yung da ka kari wa da pynbiang da ka Chief Minister’s Safe Motherhood Scheme (CMSMS) wei da hap yang ki 45 minit neidaw wa sih u sarok, kamtæ u waheh chnong ka Shnongrim da pyntip noh u cha u waheh chnong yong ka chnong Lelad wei heipor kamwa 9:15 da yoh u kit ka cha Sutnga CHC da ka kari CMSMS wa da pynbiang da u waheh chnong ka chnong Lelad.
Heipor 10:15 i step dapoi ko ha Sutnga CHC wei heipor 11:15 i step, ka Riniwanki Sukhlain da kha ko yei khon kynthai wa khia 2.96 kilo. Hadooh kattæ waroh arngut kitæ ka bei wa i khon ya biang ki wei em ki hei pait ki Doctor wa ki Nurse hapoh katai ka CHC.
Discussion about this post