U symbood montri rangbah ka jylla u Prestone Tynsong da pynche u wa ka sorkar Meghalaya ym em wow khang ko u baam doh sniang heiwa da em i sñiawthooh bakla wa ka sorkar da khang ko wow baam doh sniang.
Heiyatoh wa i suba wa yoh African Swine Fever ki sniang ha chnong Lamin, WJH. U Prestone da ong u wa hadooh kattæ ym pu em yoh yaka Report naka sorkar India wei ka sorkar ym em pynmih hukum ko wow khang u baam doh sniang wei wow thied doh sniang.
Da ong u leh wa u District Veterinary Officer da phah u ya kiwa chong chnong kiwa em chajan waka Lamin wow dam chwa ki wow baam doh sniang katwa ym pu yoh yaka Report wei hawa chet emkaam wow chet bha.
U Prestone da ong u leh wa ka hukum kawa dang em toh kawa khang wow wanrah doh sniang na baar jylla kamjooh yow ya dai ya thied na kawi ka District cha kawi ka District. Katwa hapoh ki jar jiar ki District, i choh doh, i dai i thied ym em khang wow leh.
