Ka Dr. M Ampareen Lyngdoh kawa man kawi na ki 5 ngut ki MLA ka Congress kiwa dang neh hapoh ka Party hadien wa yut 12 ngut kiwi, da ong ko ini waroh ym toh iwa thymme wei iwa da jia ha kylleiñ ka ri wei ini ym em pynkyrbeh ko ya ka Party.
Da ong ko wa ka Party daw pynlang pynlum ko yow chna yow tei biang deiwi wei da pynrap ko wa iwa jooh ktah bait ya ka Party toh iwa mih pyn napoh ym toh iwa wan na baar iwa da leh pyn da i ya i hi.
Da ban joor ko wa ka Party daw yaleh ko yow jop ya waroh ini iwa eh heijooh i por da ong wa dang em hi ka Party hapoh ka yung dorbar chna-aiñ kawa klam dei bor wa skem.
Chooh chooh da kdaw ko wa waroh ini wa jia toh i kabu ya ka Party wow pynthymme ya ka Party da ki dkhot wa ki kyrtong wa thymme, deiwa yaleh ym dei bor ka poisa tangwa deiwa jied ya ki kaam wa biang wow kreh.
Da pynsñiaw ko leh yei sñiawsih ya ini i hiar dor ka synchaar khadar, ka ya dai ya thied ya kiwa mihkhat paidbah deiwa ong wa kammon de u yoh ki yei chaniah ki paidbah lada pyrkhat ki du yei myntoi samen yong ki.
Da pynkut deiwa ong wa waroh 5 MLA toh kiwa skem wei daw pynbna ha ki sngi wow wan yeiyi wa da booh thong wow leh.
