U Symbood Montri Rangbah ka jylla, u Prestone Tynsong da ong u wa toh i kaamram yong ka sorkar jylla wow pait yei mait i bha yong kiwa chong chnong lada toh ki tre chnong lane kiwi ki jaitbru. Da ong wa i pynkyrriah ya ki bru na Them Metor man ko leh deiwa pyrkhat yei chait i khiah yong kitu kiwa sah ha katai ka thaw.
U Prestone da ong u ya ini hawa kylli hajrong i ujor yong ka seiñ saiñpyrthai Punjab ka Shiromani Akali Dal ha u Lat ka jylla hajrong i thmu ka sorkar wow kyrriah ya ki bru na Them Metor. Da ong wa ka dwar yong ka sorkar ka wai ko ya kiwa kwah wow wan yaklam, tangwa wow ong wa ka sorkar ka lehbeiñ ka toh iwa bakla.
Da ong u wa kamwa man katni, katai ka thaw ym man ko kawa biang wow chong wow sah neibhah toh ka thaw yaw wei neiliang ka High Level Committee wa da thung da ka sorkar leh da phah ya ka bui (Report) wa bniah hajrong katai ka kaam wow kyrriah ya ki bru na katai ka thaw, wei ka sorkar leh da rai bait wa emkaam wow kyrriah ya ki bru na katai ka thaw.
Ha i jooh i por u Symbood Montri Rangbah da kyntu u ya waroh wow ya krehlang wa ka sorkar jylla wei ymtoh wow pyrkhat wa ka sorkar wow noh hi-eh ko ya ki bru kiwa sah ha katai ka thaw.
Hawa kylli, u Prestone da ong u wa i kyrriah ya ki bru na Them Metor ka sorkar da ekti bait ha ka chnat Urban Affairs wa ha ka Shillong Municipal Board. Da ong wa ka SMB daw hap ko wow kyrriah chwa ya ka yungkrehkaam na Bivar Road wei hadien wa da dep hap ki wow pynchna ya ki Quarter wei wow kyrriah won ya ki bru cha katai ka thaw wow chong wow sah.
Da ong chooh chooh wa neibynta kitu ki wakreh yong kiwi ki chnat, ka sorkar da phah ko wow kyrriah ha ki bru wa kreh ha ki chnat sorkar waphær waphær.
