U Symbood Montri Rangbah ka jylla Meghalaya, u Prestone Tynsong ynne ka sngi da ong u wa i pynmih ka sorkar ya ka hukum wow khang ya kiwa sikai nei chimbynta ha ki kaam saiñhima toh wa hadien i tyrwa na ka chnat puræ puthi yeiwa ka yalang ki Montri ka sorkar jylla da chim rai ki.
Da ong u wa lada em iwon iwon i pyrchah, ka sorkar daw pait ko yeiwa bha bha wow leh ko, heiwa da ong u wa katkam i sñiawthooh yong oo, ki bru kiwa kreh kaam sorkar lada toh kiwa sikai leh lada kwah ki wow psiah cha i kaam saiñhima ye ki wow psiah ha iwon iwon i por tangwa emkaam wow ieh noh ki yei kreh kaam sorkar yong ki katkam ka Service Rule kawa da em chwa.
Hajrong i pynbaad wa kani ka hukum khang ko ya ki khroo pyrkhat wow em bynta ha ka saiñ pyrthai, da ong u wa neiliang ka sorkar da pdiang ko ya ki bru wa chemphang wa proh jabeiñ wow psiah ha i kaam saiñpyrthai.
U Prestone da ong u leh wa heipor wa psiah cha ki kaam saiñpyrthai ha u snem 2002 da ieh u yei kaam wa jooh kreh u, wei kiwi leh emkaam wow sñiawthooh ki wa chwa wow psiah cha ki kaam saiñhima lada toh kiwa kreh sorkar emkaam wow ieh noh ki yei kaam yong ki.
