Jowai : Ka JSU Central-Body ynne ka 28 tarik da lai yachem ko wa u CEM ka JHADC u Thombor Shiwat hei yatoh wa 3 tylli ki phang wa dawa ko na ka JHADC wow pynbiang ko neibynta ka jiatbru kamjooh ka bei rymaw.
Ka phang nyngkong toh wow pynkha ya ka tnat Arts & Culture Department hapoh ka JHADC ka wow pait ya ka riti dustur ya i ki khian paid kawa da sdang wiar. U CEM da mynjur u yeini deiwa ong wa ka Council boon ki scheme wa dooh ko neidaw wym em kani ka tnat hapoh yong ka.
Ka phang wa ar won toh wow chna chooh ya ki aiñ wow yada ya ki wah hapoh ka ri-loom Jaiñtia neibhah kamwa wa man katni boon ki wah toh kiwa da yap. Da e nongmuna ki ya ka wah Myntdu heiwa boon ki jakhlia jakhlait wa mih na ki yung ki sem ki bru da lai bait ki cha ka. U CEM da jubab u wa ki aiñ wow yada ya ki wah toh kiwa da em tangwa ym pu em u ye u pynkrehkaam bha ya ki.
Ka phang wa le won toh chaphang wow pynbait ya u pood u ang ki Elaka yow lait u mih i khajia ha pyrdi paradoh para snaam. U CEM da pyntip u wa da dep phah kot ki cha waroh ki Dolloi ki Elaka yow phah ki ya ki Map ka Elaka kamjooh ya ka riti dustur wa bood ki wei ka tarik wa khaddooh u pynpoi toh ha ka 30 tarik u Wisu (March).
U CEM leh da kular u wow booh ya kini ki 3 tylli ki phang ha khmat ka EC wa pynman ynne ka sngi.
Discussion about this post