Ynne ka sngi ka Jowai Municipal Board (JMB) da khut ko ya ka yalang yong ki waheh chnong yong ki 7 tylli ki chnong wa kynthup ya ka Pynthor Langtein, Umsalang, Shkenpyrsit, Mupyut, Madan Tyrpait, Moosakhia wa Sohmynting wow yaklam hajrong i kaam wa yatoh wa i thaw noh-jhep ka Board iwa em ha Mynkjai.
Kam wow pynkynmoo heini ki 7 chnong chirup wa ka KSU da khang noh ki ya ki wakreh ka JMB wow noh jhep ha ini i thaw iwa man i yong ka JHADC wei da chimwai da ka Board wei yeini i khang wow noh jhep ha ini i thaw toh wa hadien wa da pynsangeh wow chna ya ka sarok wow lai cha kani ka thaw wei i daw wa da leh yeini toh wa da noh habra ya ki jhep ha tymbut luti iwa da pyntaroi ya ka luti syngkieñ wei ka la’ær wa mih na ini i thaw da man ko kawa smatung bha.
Kamtæ i thmu wow khut ya kani ka yalang toh wow klam pynbait hajrong ini i kaam tangwa ka yalang da haap pyndam noh ya ka neidaw wa ym em kiwa wan mih na kini ki 7 chnong cha ka yalang ya kawa da khut wow sdang nadooh 1:00 i sngi wei neiliang u Chairman ka Board u Fidel War wa ki sahep ka JMB da yang ki hadooh kamwa 1:45.
Hawa yaklam wa u Chairman, da ong u wa da chem sakhiat ya itæ i noh habra ya ki jhep wei ini i jhep ymtoh iwa da noh da ka JMB namo ymtoh iwa da leh da ka JHADC wei hadien wa da phah pynkhooid ya i jhep wei da chem wa da em ki bru samen kiwa da noh ya i jhep ha ini i thaw.
Da pyntip u leh wa da em ki bru samen kiwa da tyrwa ya i thaw yong ki wow noh ya i jhep wei ya kini ki thaw daw emkaam u lai pait ya ki, da pynrap u leh wa ha ka yalang yong ka Task Force da em i thaw wa da tyrwa da ki le kur iwa em ha Samanong wei itæ leh dang man i iwa chimpor wei hadooh itæ i por emkaam chwa wow thooh da iwi i thaw wei lada emkaam daw khut yaklam leh wa ka Synjuk ki Waheh Chnong ka Jowai wow yaklam hajrong ini.
Hawa kylli wa sa katwon sngi u ye biang ka Municipal u lai thooh jhep na ki yung ha Jowai, u Chairman da ong u wa yeitæ ympu ye wow ong tangwa manda biang lut waroh i kaam, da man ka JMB kawa smat wow leh yeiwa emkaam.
