Ynne hapoh ka yung dorbar chna aiñ hapoh ka kynta wow kylli wei wow e jubab, neiliang u MLA ka North Shillong, u Adelbert Nongrum da kylli u ya u Montri wa pait ya ka chnat Transport uwa man leh kam kam u Deputy Chief Minister, u Sniawbhalang Dhar wa kammon da pynemkaam ya ka poisa kawa Rs. 200 klur kawa da yoh ka yung krehkaam u DC ka Ri-Bhoi neibynta u wanrah ya ka luti rel.
U Sniawbhalang hawa e yei jubab da ong u wa kani ka poisa da yoh ka ha ka 30-03-17 neibynta wow thied thaw tangwa ym em yoh u pynemkaam ka neidaw wym yoh thaw wei ym em yoh NOC leh na ka KHADC najrong wa em kiwa pyrchah yeini, kamtæ da sangeh noh wei ka sorkar pyrdi leh ym em booh por ko wow leh yeini.
Da pynche u leh wa kani ka Rs. 200 klur toh du neibynta wow thied thaw donhi wei hadien wa leh yeitæ daw phah ya ka DPR cha ka sorkar pyrdi tangwa neidaw wym em yoh u thied iwon iwon i thaw leh, ym ye wow lai chakhmat.
Neiliang u Chief Minister, u Conrad Sangma hawa e jubablang yeini, da ong wa ym em iwon iwon i ya pynbait sop-sop waka sorkar pyrdi wei kani ka poisa toh du neibynta wow thied thaw donhi wei neidaw wym ye u leh yeini, neiliang ka Northeast Frontier Railways ha ka 17-12-24 da phah chithi ko wow pynuiñ noh ya kani ka poisa neidaw wym ye u pynemkaam ka.
U Conrad da ong u wa kamwa man kattæ i pyrchah toh yow booh ya ka luti rel wei iwa mut hi yow pyrchah ya ka rel wa kit bru kamjooh kawa kit mar. Tangwa kam ka sorkar kwah ko wow emlang kiwa chong chnong ha kawon kawon ka rai neibhah deiwa em luti rel daw yarap ko wow pynku ya ka kamai kajih, daw pynhiar ko yei dor ki mar, i bai kit bai bah ya ki mar wa wan chapoh ka jylla kamjooh kiwa mih napoh ka jylla khamtam kitu kiwa pynmih kiwa boon ki mar ki mata napoh ka jylla.
Da e nongmuna u leh kam heipor wa em ka khlam COVID wa lada em ka luti rel da suk u phah chiboon ki mar heithaw wow pynkit da ki kari na baar.
Discussion about this post