Ki VEC yong ka Lumshnong C&RD Block Association ha ka 9 tarik da yoh ki wow pynman ya ka General Meeting neibynta wow yaklam hajrong i pynche (Clarification) u BDO ka Wapung C&RD Block heiwa da ong u wa ki VEC ym em wan e (Submit) ki ya ki Material Bills yong ki ha i por wa biang, wei da ong u leh wa ka yung krehkaam u dadep pynlait ko ya ka bai ki mar ki mata (Materials) yong ki neibynta kani ka Finacial Year 2023-2024.
Neiliang yong ka Association da sñiaw kulmar ko yeini i pynche u BDO ka wym em yurim neibhah ki VEC jooh lai Submit ki ya ki Utilization Certificate (UC) ha i por wa biang chwa u kut u Financial Year neibhah da tip che wow Submit heipor wa biang neibhah da ki phaw tylli ki snem da kreh ki yeini i kaam, tangwa ha uni u snem u BDO ym chah u ya kiwa kreh yong oo wow pyndap (Enter) ya ki Material Bill yong ki wot wa da Submit ha i por wa biang leh.
Da pynkynmoo leh wa ki dkhot yong ka Association dei sñiawkhia ya kani ka kaam dadep ki wow yachem wa uni u BDO ha kini ki bnai wa dadep tangwa ka jubab wa da yoh na oo toh deiwa ong u, “Ka State ym chah ko wow Enter ya ki Material Bill yong ki” wei da e yumut u leh wow yachem wa ki bor wa hajrong.
Hajrong ini, ka Association da lai ko wow yachem wa u Project Director ka DRDA ka East Jaiñtia Hills District uwa man leh kam u Deputy Commissioner wa ya ka Joint Mission Director SRES yow yoh yei pynche tangwa da sñiaw phylla wa ka Joint Mission Director da pynche ko wym em kam katæ ka aiñ wym chah wow Enter ya ki Material Bill hadien wa dadep wow kreh yei kaam, chooh chooh da ong wa dadep u pynlait ya ka bai Material kawa duna Rs. 15 klur yow e cha waroh ar tylli kitai ki C&RD Block (Wapung wa Lumshnong), tangwa sñiawsih wow ong wym em tang kawi leh ka VEC kawa em hapoh Lumshnong C&RD Block kawa da yoh bai Material yong uni u Financial Year 2023-2024, tangwa uni u BDO da thok u deiwa ong dadep pynlait bai Material cha kini ki VEC kiwa em ha Lumshnong C&RD Block.
Da ong leh wa chibet da ong wym chah ka sorkar jylla wow Enter, chibet won da pynbaad u wa slem wow Submit ya ki Material Bill wei kam ka Association ym sñiawthooh sñiawthaw de ko ya ini i kyllaiñ khlieh khlieh tdong tdong. “Ileh wa uni u BDO ym klam che u, tangwa da pynbaad pathan ya ka sorkar wym chah u Enter ya ki Bill, wei pynbaad won u ya ki VEC wa slem ki wow wan Submit wei ini ymtoh iwa ye u pdiang,” da ong ka Association deiwa pynrap wa pyrchah yei klam kyllaiñ chibet deiwi chibet deiwi.
Kamtæ ha katai ka yalang, ki VEC yong kini ki chnong hadien wa da wai ka yalang da lai biang ki wow yachem ya uni u BDO dei thmu wow yaklam markhmat wa ki VEC kamwa da khut ha ki laad pathai khubor tangwa manda poi ym em u ha kamra krehkaam u wot hadien wa da pyntip chwa wei hawa pyrchang Phone da ki phaw sien leh ym em rap u.
Kamtæ hajrong kani ka bynta, ki VEC waroh da pynsñiaw ki yei lyngngoh ya ini i leh yong uni u BDO, wei hadien kani neiliang yong ki VEC da e noh ki dei thoh khnang wa uni u BDO u pynche u ya ini i pynbaad yong oo ya ki VEC kiwa em ha Lumshnong C&RD Block.
Puræ leh: Pynche u BDO yei pynbaad ki VEC ka Lumshnong C&RD Block
Discussion about this post