Ka chnat puræ puthi ka jylla ynne ka sngi da chim ko ya ka rai wow laibait chakhmat wow pynman ya ki Exam SSLC/HSSLC, wei da rai leh wow elaad u yaleh Exam biang lada em ki khynnah kiwa yoh COVID-19, tangwa ym pu em chim yei rai won wow khang ya ki thaw puræ kiwa em ha ka jylla.
Hawa klam ynne ka sngi, u Montri wa pait ya ka chnat puræ puthi u Lahkmen Rymbui da pyntip u wa wa kitu ki khynnah lane ki khynnah khynroo kiwa lai puræ kiwa yoh ya u khñiang COVID-19, ye ki wow yaleh ya ka Exam hadien, tangwa hap wow wanrah won ya ka Report wa da Test da ka RT-PCR.
Ka Meghalaya Board of School Education (MBOSE) da dep ko wow pynbna wa ki Exam SSLC da booh wow pynman nadooh ka 19 tarik, katwa ya ka HSSLC daw sdang nadooh ka 16 tarik uni u bnai.
Katkam i pyntip u Montri, da em kamwa 65,787 ngut kiwa yakhun ya ka SSLC wa 32,499 ngut kiwa yakhun ya ka HSSLC uni u snem, heiwa da pynrap wa neiliang ka chnat wei kamjooh ki Center wow pynman ya ki Exam, man ki kiwa da pynkhreh yow pynman Exam deiwa bood leh ya ki kyndon kamwa da phah da ka chnat i chait i khiah.