Jowai: Ki kattu katni ki phang wa emkaam u tip phi chaphang ka T. 500 wa T. 1000 hadien wa da rai wow pynwiarnoh ya ki.
U PM ka India u Narendra Modi ynne ka sngi da pyntip u wow yaleh pyrchah ya ka poisa thok kamjooh leh ya ka poisa wa murieh kiwa boon yow lait na i khrong dan (Tax) ka sorkar da rai ko wow pynwiar noh ya ka kot T. 500 wa T. 1000 wei nadooh ka 12 waje i miet yong ka ka 9 tarik kini ki poisa ym em dor de ki.
Ya kiwa em ya kini ki poisa da booh por ya ki hadooh ka 30 tarik u Kmaichonglad wow kylliang ya ki.
Ki mat wa kongsan man ki kamni hawah :-
1. Ya kiwa ym ye u kylliang hapoh ka 30 tarik da e por ya ki hadooh ka 31 Wisu (March) 2017 ha ka Reserve Bank of India deiwa wa pynche wa neiwon mih kani ka poisa. Heiwa ki ATM ym krehkaam de ki na ka 9 tarik hadooh 10 tarik u Khonchonglad (November) ha ki thaw wa boon.
2. Waroh ki ATM nadooh ka 9 tarik hadooh ka 10 tarik chiteiñ sinyaw ym krehkaam de ki.
3. Waroh ki bank ha ka 9 tarik ym krehkaam ki.
4. Daw pynmih leh ya ka poisa thymme wa T. 2000 wa T. 500 da ka RBI.
5. Manda wai ki ATM ym pynmih poisa de ki ya ki kot T. 500 wa T. 1000 wa rim.
6. Hadooh ka 11 tarik ya ki poisa T. 500 wa T. 1000 ye u pynemkaam ya ki heiwa su ya ki ticket train wa pyllai da ka sorkar, ki aeroplane wa pyllai da ka sorkar, wa ki hospital sorkar.
7. Dang ye hi leh wow su ya ki bai Petrol, Diesel wa da tipmit da ka sorkar.
8. Ya ka poisa thymme wa chongdor T. 500 wa T. 2000 daw pynmih ka RBI nadooh ka 10 Khonchonglad (November) 2016.
Discussion about this post