Ka sorkar pyrdi da kular ko ya ka Bombay High Court wa ym leh ko iwon iwon pyrchah ya u Actor, u Imran Khan hadooh ka sngi wow chong bichaar biang ya oo ha ka 2 tarik u November heiyatoh wa ka Notice wa phah mih ya oo napoh ka ri.
Kani ka Notice wa yoh u Imran toh wa man u kam uwa chong chnong ka USA heiwa da chimbynta u ha i yakhih ha ka 10 tarik u October wow dawa hiar chuki ya u Chief Election Commissioner (CEC), u Gyanesh Kumar wa i pyrchah ya ka Special Intensive Revision (SIR) wa pynkrehkaam ka ECI heiwa da phah mih ya oo na ka ri hapoh ka 28 tarik u October 2026.
U Imran Khan man u kam u Overseas Citizen of India (OCI) wei da lai u cha ka High Court ha ka 17 tarik u October pyrchah ya ka hukum ka Foreigners Regional Registration Office (FRRO) heiwa da kyntait u wa embynta u wa ki seiñ wa pynman yakhih.
Ya ka Notice da e hajrong ka ujor u heh ka BJP, u Kirit Somaiya, uwa da pynbaad wa u Imran Khan da tyngkheiñ u ya ki kyndon Visa kam u nong America.
Ya ka hukum ka FRRO da phah katkam ka Immigration and Foreigners Act, 2025 hapoh ka Section 7 heiwa ka sorkar pyrdi ye ko wow booh kyndon yei psiah i mih ki baar ri hapoh India.
Kam wow kdaw heini wa ha ka 10 tarik u October ha i yakhih wa pynman ha August Kranti Maidan, Mumbai wa da khut da ka Cockroach Janata Party (CJP), kiwa yakhih ha Mumbai leh da chimbynta ki wow dawa kyrriah næ pynhiar chuki ya u CEC kamjooh i bakla ha ka SIR wa Electoral Roll.
Ynnin ka sngi u Lawyer u Khan, u Venkatesh Dhond, da kdaw u ya ka hukum yow mih na India ha ka 28 tarik u October wa ya ki yurim waroh heiwa u Additional Solicitor General ka sorkar pyrdi, u Anil Singh da kular u ya u Chief Justice, u Mahesh Chandra Tripathi wa u Justice Advait Sethna wa ym leh iwon iwon pyrchah ya u Khan kat hadooh wa poi ka sngi wow chong bichaar biang yei kaam ha ka 2 tarik u November.
Discussion about this post