15 49.0138 8.38624 1 0 4000 1 https://wyrta.com 300 0

Advertisement ad1

Ym mano ka sorkar Meghalaya yei hukum ka Supreme Court wow pyndam noh ya ki Parliamentary Secretary: I. Thamar

0 Comments

Jowai: U Ioannis Thamar uwa na Jowai da e dorkhat u cha u Lat ka jylla yow pynkrehkaam u ya ka kyndon Article 192 ka riti synchaar ka ri yow tynyap (Disqualify) noh ki MLA wa yoh nong deiwa man ki kam ki Parliamentary Secretary hapoh ka jylla Meghalaya.

Ya ini da pynchong yurim u hajrong ka hukum wa pynmih ka Supreme Court ha u Naiynñiaw uni u snem hei yatoh wa ka mukotduma wa em wa yaleh ha ka Supreme Court wow pyrchah ya ka aiñ wa chna ka jylla Assam wa tip kam ka “The Assam Parliamentary Secretaries (Appointment, Salaries, Allowances and Miscellaneous Provision) Act, 2004 heiwa da pynmih ya ka rai da ka Supreme Court wa kani ka aiñ toh kawa pyrchah aiñ.

Ha ka dorkhat wa booh u Thamar ha u Lat ka jylla da ong wa ha ka jylla Meghalaya leh da em kam kani ka jooh ka aiñ wa tip kam ka “The Meghalaya Parliamentary Parliamentary Secretaries (Appointment, Salaries, Allowances and Miscellaneous Provision) Act, 2005 heiwa da thung ka sorkar hadooh 17 ngut ki MLA wow man ki kam ki Parliamentary Secretary.

Da e nongmuna u leh wa ha ka jylla Mizoram ki 7 ngut ki MLA wa ksoh kam ki Parliamentary Secretary da ieh ki ya ini i kyrdan wei ka sorkar Mizoram leh da pynbait ko wa ka Guwahati High Court wow pyndam noh ko ya ka aiñ wow thung Parliamentary Secretary.

“Tangwa ha ka jylla Meghalaya won uwi leh ym em wot leh uwa mihkhmat wa ieh yei kyrdan Parliamentary Secretary kawa man pyrchah aiñ katkam ka hukum ka Supreme Court.” da ong u Thamar.

Da ong u leh wa i kyrdan Parliamentary Secretary toh iwa tip kam ka Office of Profit hapoh ka Article 191 ka Constitution of India wei katkam kani ka kyndon da toh u tynyap namo wow Disqualify noh ki ya ki wei heijooh i por ka poisa wa pynemkaam ki nadooh wa ym ye de u man kam ki kam ki Parliamentary Secretary hap pynuiñ ki ka.

Da pynkut u deiwa wa ong wa yoophylla wa suki ka sorkar Meghalaya hei yatoh wa ini kamwa ym em krehkaam ki hukum ka Supreme Court hapoh ka jylla Meghalaya.

Advertisement ad1

0 Comments

Leave a Reply