Man i iyi iyi iwa diaw wei iwa pynsñiawsih wow yo wa ka sorkar jylla lyngba ka chnat i puræ puthi da pynmih ko ya ka hukum ha ka 26-03-2021 wa ki skur u sdang noh ki nadooh ka 1 tarik uni u bnai, wei katkam wa chem ka seiñ Jaiñtia Students Movement (JSM) Western Region wa em 4 tylli ki Government LP School kiwa kynthup ya ka Lumkdung Govt School, Samatan Govt LP School, Mynngor LP School wa ka Thadmuthlong Govt LP School kiwa haap hapoh i pait i yoo ka District School Education Officer (DSEO) Jowai wa waroh 4 tylli kini ki skur ym em wa sikai ki.
Hajrong ini i eh i khoo ki khynnah wa ki bei ki pa yong kini ki skur, neiliang ka JSM Western Region hapoh i yahkhmat u Ribok Biam Education Secretary JSM WR, General Secretary WR u C. Suchiang wa u President warim ka JSU, u Lawyerson War, ynne ka 6 tarik da lai ki cha kini ki skur heiwa da chem wa ki khynnah skur wan ki cha ki skur nadooh i step hadooh wa kut i por skur wa liwan ki cha yung khlem wan kiwa sikai.
Hajrong ini i chah iehbeiñ kini ki skur cha palat-sor da pynchrai i ya ki paidbah wow dawa na ka sorkar wow pynbiang yeiwa emkaam ki paidbah ka jylla khamtam heiyatoh wa i puræ puthi.
Kamtæ ka seiñ da dawa ko na ka sorkar wow thung noh ya kiwa sikai wow e ya i hok yong ki khynnah skur palat-sor.
Kani toh katkam ka Wyrta na u Ribok Biam Education Secretary JSM Western Region.
