Uwa yahkhmat ka National People’s Party (NPP) uwa man leh u MDC ka Rambrai, u Bajop Pyngrope da beiñ u deiwa joor ya ka Voice of the People Party (VPP) deiwa ong ka wym ye ko u neh slem neibhah sa kattu katni por kiwa yahkhmat daw pynkulmar ki para ki hi.
Da ong u wa katkam wa pait i long i man ka pyrthai katni, ka VPP daw pynkulmar yumut chwa ko ya para kiwa yahkhmat, neibhah ka Politics wa lai luti ka VPP ym ye u pdiang neibhah man ko deiwa synchaar embor donhi, iwa kiwa boon ym ye ki wow pdiang wei ym ye ko wow neh slem deiwa wanrah yei ya sñiaw yaphær jaitbru, wei ki paidbah ka jylla ym ye ki wow pdiang yeini.
U Bajop da ong u leh wa waroh chi kattu ka VPP da yalehke ko samen khlem da em bru wei da yoh ki wow thap kool katwa ngait tangwa ha kini ki sngi ka NPP da pynkhreh ko wow mih madan yow pynche paidbah hajrong ki kaam waphær waphær yong ka sorkar MDA-II.
Da kyntait u leh yei ong wa ka NPP ym pu ye ko wow sooh-thied ha Khasi wa Jaiñtia Hills du neidaw wa duna ki MLA wa jop. Da pynkynmoo u wa ha uni u snem ka NPP da yoh ko da jan 18,000 Vote na Khliehriat, ha Sohiong da rem Election tangwa da yoh 13,000 Vote, kamtæ u ong wa ym em sooh-thied ym ye u pdiang wei ka NPP toh ka Party kawa yoh boon tam ki Vote ha ka jylla bar ya kiwi katkam ka yukheiñ ka Election Commission.
Da ong u leh wa ka chnat khynroo ka NPP, ka NPYF da chong yalang ko ynne ka sngi yow yaklam ya phyllu yumut wei wow bichaar ya ka Election kawa dang dep man yow yoh u ap yei pynsñiaw na ki thaw wa rem yow ye u pynkhlan chooh chooh ya ka Party.
