Ka Khasi Jaiñtia Church Leaders Forum (KJCLF) da ong ko wa ym pdiang ko ya kiwon kiwon ki kaam yakhle, heiwa ynne da yachem ko leh ya u Montri Rangbah ka jylla, u Conrad K Sangma wow pyrchah hajrong i thmu ka sorkar wow wanrah ya ki aiñ neibynta ki kaam yakhle.
Hawa yaklam wa kiwa patahi khubor, u Secretary ka KJCLF, u Rev. EH Kharkongor da ong u wa u Montri Rangbah da ong u wa ka sorkar ym rai ko wow lai chakhmat wow pynkrehkaam, hanla ka sorkar da wanrah ko da ki kyndon. Da ong u wa u Montri Rangbah da pyntip u wa ka sorkar chwa wow lai chaphrang daw em leh i yaklam wa ki paidbah ymtoh deiwa leh jhan.
U Conrad da pynsñiaw u leh wa i leh ka sorkar toh wow pynmih poisa neibynta kiwa boon ki kaam.
U Rev. Kharkongor da ong u wa ki daw wa ka Forum pyrchah ko wow pynman aiñ ya ki kaam yakhle toh wa daw ktah ko ha kiwa boon ki liang ha ka imlang sahlang, wa ya ki yung ki sem wei khamtam wa ki kaam yakhle pynkhai won ko ya kiwi ki kaam dakait.
Hawa kylli hajrong i sñiaw ka KJCLF ya ki kaam yakhle kiwa da em chwa, da ong u wa ka Forum ympu yoh yaklam ko iwon iwon, tangwa u Montri Rangbah da pynche u wa ka sorkar daw booh ko ya ki kyndon neibynta ki kaam yakhle ya kiwa ka Forum leh sñiaw ko yei emkaam.
U Rev. Kharkongor da ong chooh chooh u wa kam kiwa yahkhmat niam Kristan, ka Forum ym pynchlur ko ya ki kaam yakhle tangwa ymye ko wow khang ya ki kaam samen yong kiwi tawon.
