Nongpoh: Ki soo tylli ki seiñbhalang wa kynthup ya ka Khasi Student’s Union (KSU), ka Federation of Khasi Jaintia and Garo People (FKJGP), ka Hynniewtrep National Youth Front (HNYF) wa ka Ri-Bhoi Youth Federation (RBYF), da dawa ki wow pynkrehkaam smat noh yaka Inner Line Permit (ILP) ha ka jylla kamwa da e ya ka jylla Manipur du hapoh i por wa tbian. Ha i jooh i por da pynsñiaw wa da la kammon kammon leh ym pdiang ya ka Citizenship Amendment Act wow pynkrehkaam hapoh ka jylla, kat wym pu yoh ya ka ILP.
Ki soo tylli ki seiñbhalang ynne ka sngi da lai hiar lai pait ki yaka thaw wa chna yaka khyrdop (Entry/Exit) ha ka chnong Umling, Ri-Bhoi District.
U Wellbirth Rani uwa man u President ka FKJGP, da ong u wa ka sorkar India kawa pynskem wow yada ya ki paidbah ka jylla Manipur deiwa e ya ka ILP, tangwa ileh won yaka Meghalaya da pynslem. Da ong u wa katkam i klam yong u Deputy Chief Minister, ka sorkar jylla ym em mylliñ ko wow pynkynmoo ya ka sorkar India yei dawa ILP, tangwa kam ki seiñbhalang kwah ki wow tip la ka sorkar India ap ko næ ym em yei sñiaw ka sorkar jylla.
Hawa yatoh waka khyrdop wa pait ya ki bru wa wan na baar jylla, u Rani da ong wa i lai pait ya itai i chna toh neidaw wa i ya ksaaid du neibynta katai ka wi ka thaw da chimpor hadooh 4 snem, wei katwon u chimpor wow chna ya kiwi won ki khyrdop ha kylleiñ ka jylla.
U President ka KSU, u Lambokstarwell Marngar da ong wa ki soo seiñbhalang daw sdang noh ki yaka Democratic Movement wow pynsñiaw cha ka sorkar India ya i ood ki paidbah wow yoh noh ya ka ILP.
Da ong u wa ka seiñ ka klam che ko cha ka sorkar India wa ym ye ko wow kdung ya kiwi kiwa na baar ka jylla, wei toh u yada ya kiwa chong chnong wa jan kylla khian paaid.
U Marngar da ong u wa ha kini ki sngi wow wan, ki soo seiñ daw pynbna chooh chooh ya ki luti yakhih da kiwa jai jai wow pynsawa yei dawa yong ki paidbah ka jylla.