Ynne ka sngi kawa man ka sngi wa sdang yong ka Dorbar Mang Tangka ka JHADC, neiliang u MDC ka Congress na Jowai Central, u A. Andrew Shullai da kylli u ya i kaamram yong ka Market Monitoring Committee ka Council.
U EM ka Council uwa pait ya ka chnat Market u E. Teron da jubab u dei thoh heiwa da ong wa ka Committee pait ko yei pynkrehkaam ya ki yaw hapoh ka chnat katkam ki kyndon ka aiñ JHAD (Market and Control of Markets) Regulation 1975.
U Andrew da kylli chooh chooh u wa la katwon tylli wei kiyi de ki yaw wa da Register hapoh ka Council kiwa em ha Jowai, neiliang u Teron da ong u wa da em 3 tylli ki yaw ha Jowai wa da tipmit (Identified) kitæ toh ka Yaw Chor, Yaw Chyiap wa ka Yaw ka Seiñraij Jowai.
Hajrong lada da Register næ yoh NOC ki na ka Council, neiliang u Teron da ong u wa hadooh katni ym pu em wa wan chim NOC wei ka Yaw Chor wa Yaw Chyiap da man ki kiwa smat wow leh yeini tangwa dang yang ki sa i rai na ka Seiñraij Jowai lada chim ko ya kani ka NOC.
