Ka High Powered Committee (HPC) wa pait yei chna yaka Yung Dorbar Chna Aiñ wa thymme yong ka jylla, ynne ka sngi da rai ki wow e kti cha ka ‘Third Party Audit’ yow thooh ya ki daw wa oor i khlieh tnoom namo ka ‘Dome’ ha ka 22 tarik uni u bnai.
Ynne ka sngi neiliang u Lamphang ka Yung Dorbar Chna Aiñ, u Metbah Lyngdoh deilang wa u Montri Rangbah, u Conrad K Sangma, ka Company wa pynkreh deilang wa ki Engineer ka chnat PWD (Building) da lai pait ki yei thaw wa oor wei hadien ini da chong leh ya ka yalang yong ka High Powered Committee deiwa emlang leh uwa yahkhmat ka Liang Pyrchah, u Dr. Mukul Sangma.
Hawa klam cha ki laad pathai khubor, u Metbah da ong u wa ka HPC da rai ko wym chah ya kiwon kiwon kiwa na lait wow psiah cha kani ka thaw, wei daw tymmoh noh chwa ya i thaw wa jia yow lait naka um. Chooh chooh da khana u wa ka Committee da rai wow e kti ha kawi na ki IIT, kiwa ye u man da ka IIT na Guwahati, IIT na Kolkata lane da ka IIT na Delhi wow thooh yei daw wa oor kani ka khlieh tnoom wei ini chong hei smat kawi na kitai ki IIT.
Da ong u wa i kaam yong ka ‘Third Party Audit’ man ko leh wow pait yei chngaaiñ kiwi ki bynta i chna hachwa wow lai chakhmat biang yei kreh. Da ong u wa ka HPC ym em booh por ko ya katai ka takit tangwa da kyntu wow phah noh ya ka bui (Report) takit rap smat katwa ye.
Chooh chooh u Metbah da ong u wa ka HPC daw chong biang ko yow chim rai hadien yoh ya ka Report yong ka ‘Third Party Audit’, wei katwa ym pu dep ka takit ym pu chah wow pynkhooid næ tba ya i thaw wa oor ka tnoom.
