Hadien wa oor noh i khlieh ka tnoom yong ka Yung Dorbar Chna Aiñ wa thymme kawa dang chna, da mih i pynbaad na kiwa boon ki liang pyrchah ya ka sorkar synrop MDA wa yahkhmat da ka National People’s Party (NPP), wei ka BJP da dawa ko leh ya u Montri Rangbah wow hiar chuki noh u hajrong i tkoh krehkaam lada ymye wow thung da ka takit wa laitlooid.
Hawa kylli ynne ka sngi, u Montri Rangbah ka jylla uwa man leh u National President ka NPP, u Conrad K Sangma da ong u wa ya ka takit hap leh da ka dhab wa tip yei kaam, wei da rai wow wanrah da ka IIT wow thooh ya i daw wei puræ bniah yeiwa jia wei neiliang ka sorkar wa ka HPC hap yang ki hadooh wow yoh ya ka bui na kani ka takit.
Hajrong i dawa wow hiar chuki noh kam u Montri Rangbah ka jylla, u Conrad da ong u wa ymtoh i rai u samen, tangwa toh i rai ki MLA wa emlang ha ka sorkar synrop ki wow chim yei rai neibhah toh ki MLA kiwa da jied ya oo kam u Montri Rangbah.
