Shillong: U Montri wa pait yaka chnat puræ puthi ha ka jylla, u Lahkmen Rymbui da pynsñiaw u yei kyrmen wa ka sorkar pyrdi daw pynlait noh ko ya ka tulop kiwa sikai SSA ha chwa ka Christmas, kawa da sahkut nadooh u Naisaphra uni u snem, deiwa pyntip leh wa i wym pynlait poisa ka sorkar ym toh wa da ktah ko du ya kiwa sikai, tangwa da ktah ko leh yei pyntyllung ya ki kaam ka Samagra Shiksha Abhiyan.
Da pyntip u wa ka sorkar jylla ha kini ki 3 bnai da yaklam ko waka Ministry of Education ka sorkar pyrdi wei wow kyntu pynlait noh ya ka tulop kiwa sikai skur SSA hapoh ka jylla.
U Rymbui da pyntip u leh wa hadooh katni ka sorkar pyrdi ym pu em pynlait ko tang kajiak leh ka poisa neibynta kiwa sikai skur SSA, wei pyntip u leh wa ka poisa lyngba ka ‘Corpus Fund’ neibynta i emkaam wa jhan kawa man T.79 klur wa da bhah da u Montri Rangbah ka jylla leh da dep wow pynemkaam, wei ya kani ka poisa leh daw hap u pynuiñ cha ka sorkar jylla neibhah wym toh i bhah neibynta wow su tulop cha kiwa sikai.
Kiwa sikai hapoh ka chatri yong ka Meghalaya SSA Schools Association ( MSSASA) da pynbna ki wow pynman da ka ‘Post Card Campaign’ ha ka 15 tarik uni u bnai, kam i dak wow pynyoo yei pyrchah ya ka chnat puræ puthi yong ka sorkar pyrdi hajrong i wym pynlait ya ka tulop kiwa sikai SSA kattu la 5 bnai nadooh u Naisaphar hadooh u Kmaichonglad uni u snem iwa da wanrah yei eh hawa im ki man-ka-sngi khamtam ha i liang ka poisa poilaiñ.
