U Montri Rangbah ka jylla, u Conrad K Sangma da ong u wa i yaklam wow kyrriah noh ya ki bru na Them Ïewmawlong ym pu kut ko, neibhah ym toh i kaam wa suk wow pynbait, khamtam wa ktah ym du ha kani ka jylla, tangwa wot chadooh cha baar ka jylla.
Ini i klam u Conrad toh hawa kylli hajrong i dawa yong ka Harijan Panchayat Committee na ka sorkar neibynta wow mih na Them Ïewmawlong kawa tip leh kam ka Sweepers’ Colony, wei ya ini i dawa da mih leh i pyrchah na kiwa boon.
Da ong u wa ka sorkar ka da lai jngai bha ko hawa yatoh wow ini i kyrriah wa i eh wa da mih na Them Metor, hanla ym pu poi cha ka thong. Da ong wa ka HPC da pynsñiaw ko wa ka leh em ko yei hok, tangwa ka sorkar daw hap ko u bichaar wa lada ka sorkar ka chem ko wa i dawa man ko palat pood wow yaklam biang wa ki.
Da ong u wa kam kini ki yaklam ym ye wow pynkut du ha i yachem wa chi sngi ar sngi, tangwa ka sorkar da lai ko chakhmat bha, wei ka sorkar ka hap ko wow chim leh wa waroh toh kiwa chong chnong ka Meghalaya wei toh i kaamram ka sorkar wa waroh u yoh ki yei yada wei wow pyntikna leh wow pynbait yei eh diwa ap leh na waroh arliang.
